ADYM.KZ / Қазақстанда туризм мен спорт салаларын цифрлық трансформациялау аясында жасанды интеллект (AI) технологияларын енгізу жұмыстары қарқын алмақ. Бұл мәселе ҚР Туризм және спорт министрі Ербол Мырзабосыновтың жасанды интеллект саласындағы әлемге танымал сарапшы, 01.AI компаниясының бас директоры, Sinovation Ventures компаниясының төрағасы, профессор Ли Кай-Фумен кездесуінде талқыланды.
Министрліктің баспасөз қызметінің хабарлауынша, тараптар спорт пен туризм салаларына AI шешімдерін енгізу, цифрлық инфрақұрылымды дамыту және халықаралық тәжірибе алмасу бағытындағы ынтымақтастықты сөз етті.
Ербол Мырзабосыновтың айтуынша, жасанды интеллектіні дамыту – Қазақстанның стратегиялық басымдықтарының бірі. Ал спорт пен туризмді цифрландыру бұл салалардың тиімділігін арттырып, азаматтар мен шетелдік қонақтарға көрсетілетін қызмет сапасын жақсартуға мүмкіндік береді.
Кездесуде спортшылар, жаттықтырушылар, төрешілер, спорт ұйымдары мен жарыстар туралы мәліметтерді біріктіретін бірыңғай e-Sport цифрлық платформасын құру мәселесіне ерекше назар аударылды. Болашақта AI технологиялары жаттығу процесін талдау, спортшылардың қалпына келуін бақылау, тамақтану бойынша жеке ұсынымдар әзірлеу, жарақаттың алдын алу және бейнематериалдарды сараптау арқылы техника мен тактиканы жетілдіруге пайдаланылмақ.
Туризм саласында да ауқымды цифрлық жобалар қолға алынуда. Қазіргі уақытта министрлік туристік нысандар, бағыттар, қонақүйлер, ұлттық парктер және туристік ағындар туралы ақпаратты біріктіретін бірыңғай цифрлық платформаны әзірлеуде.
Келесі кезеңде туристерге жеке саяхат маршруттарын ұсынатын, бірнеше тілде кеңес беретін әрі сапар бойы бағыт-бағдар көрсететін интеллектуалды цифрлық көмекші іске қосу жоспарланып отыр.
Профессор Ли Кай-Фу Қазақстанның туристік әлеуетіне жоғары баға беріп, жасанды интеллект технологиялары туристік сервистің сапасын жаңа деңгейге көтеруге мүмкіндік беретінін айтты. Оның пікірінше, AI шетелдік туристерге жедел аударма жасау, бағыт-бағдар беру, туристік ағындарды талдау, сұранысты болжау және басқарушылық шешімдер қабылдауға қажетті аналитикалық деректерді әзірлеу ісінде маңызды рөл атқарады.
Кездесу қорытындысында тараптар спорт пен туризм салаларына заманауи жасанды интеллект технологияларын енгізу бағытындағы ынтымақтастықты кеңейтуге және тәжірибе алмасуды жалғастыруға уағдаласты.
