ADYM.KZ / Қазақстанда 18 шілдеден бастап қолданысқа енгізілетін цифрлық теңге көпдеңгейлі қорғаныс жүйесімен қамтамасыз етіледі. Бұл туралы ҚР Ұлттық банкі редакция сауалына берген жауабында мәлімдеді.
Ұлттық банктің хабарлауынша, цифрлық теңге платформасын әзірлеу кезінде қазіргі және болашақта туындауы мүмкін киберқауіптер ескеріліп, пайдаланушылардың деректері мен қаржылық операцияларын қорғауға басымдық берілген.
«Цифрлық теңге платформасы деректер мен операциялардың қауіпсіздігін барынша қорғауды көздейді. Оны әзірлеу барысында қазіргі және келешекте туындауы мүмкін киберқауіптер ескерілді», – делінген ресми жауапта.
Ведомствоның мәліметінше, платформаның қауіпсіздігі бірнеше деңгейде қамтамасыз етіледі. Атап айтқанда, екінші деңгейлі банктер арқылы жүргізілетін операциялар заманауи шифрлау және қолжетімділікті бақылау технологияларының көмегімен қорғалады.
Сондай-ақ инфрақұрылым деңгейінде серверлердің физикалық қауіпсіздігіне, жүйенің тұрақтылығы мен ақауға төзімділігіне ерекше назар аударылады. Бұдан бөлек, цифрлық теңгемен жұмыс істейтін барлық сервисте рұқсатсыз қол жеткізуді және кибершабуылдарды болдырмауға бағытталған қосымша қауіпсіздік шаралары қолданылады.
Ұлттық банк мамандары жүйені үздіксіз бақылап, ықтимал қауіптерді дер кезінде анықтау және оларға жедел әрекет ету жұмыстарын тұрақты жүргізетінін атап өтті.
«Осылайша, цифрлық теңге платформасының қорғаныс жүйесі жан-жақты әрі көпдеңгейлі болып құрылған. Бұл әр кезеңде пайдаланушылар мен деректердің қауіпсіздігін қамтамасыз етеді», – делінген Ұлттық банк жауабында.
Еске салайық, цифрлық теңге Қазақстанда 2026 жылғы 18 шілдеден бастап ресми түрде қолданысқа енгізіледі.
