ADYM.KZ / Қазақстанның бірқатар өңірінде ауқымды жаңғырту жұмыстарынан өткен 30 теміржол вокзалы мен жолаушылар инфрақұрылымы нысаны пайдалануға берілді. Жоба Мемлекет басшысының көлік инфрақұрылымын дамыту және жолаушылар тасымалының сапасын арттыру жөніндегі тапсырмаларын орындау аясында жүзеге асырылды.
Көлік министрлігінің мәліметінше, бұл – соңғы жылдардағы теміржол вокзалдарын жаңартуға бағытталған ең ірі жобалардың бірі. Реконструкция нәтижесінде жолаушыларға көрсетілетін қызмет сапасы жақсарып, қауіпсіздік пен жайлылық деңгейі артты. Сонымен қатар вокзалдардың өткізу қабілеті ұлғайып, теміржол қызметкерлеріне заманауи еңбек жағдайы жасалды.
Жаңғырту барысында вокзал ғимараттарының қасбеттері мен шатырлары жөнделіп, энергия үнемдейтін витраждар орнатылды. Сондай-ақ жылу, сумен жабдықтау, желдету, ауаны баптау, өрт қауіпсіздігі және бейнебақылау жүйелері толық жаңартылды. Құрылыс кезінде негізінен отандық өндірістің материалдары пайдаланылған.
Мүмкіндігі шектеулі азаматтарға қолайлы орта қалыптастыруға ерекше назар аударылды. Вокзалдарда пандустар, лифтілер, бейімделген кіреберістер мен санитарлық бөлмелер, тактильді жолақтар және арнайы касса аймақтары жасақталды. Нысандардың ерекшелігіне қарай ана мен бала бөлмелері, медициналық пункттер, сақтау камералары ашылып, жолаушылар ағынын тиімді ұйымдастыру үшін ішкі жоспарлау қайта қаралды.
Кешенді жаңғырту вокзал ғимараттарымен шектелмей, жолаушылар платформаларын, вокзал маңындағы аумақтарды және инженерлік инфрақұрылымды да қамтыды. Барлық нысан заманауи қауіпсіздік талаптары мен санитарлық нормаларға сәйкестендірілді.
Министрліктің мәліметінше, елдегі теміржол вокзалдарының басым бөлігі өткен ғасырдың 1950–1970 жылдары салынған. Кейбір ғимараттардың пайдаланылып келе жатқанына 80–100 жылдан асқан. Ал вокзалдардың шамамен 70 пайызы ондаған жыл бойы күрделі жөндеу көрмеген.
Жаңғыртудан кейін пайдалануға берілген вокзалдар:
Абай облысы: Ауыл, Белағаш;
Ақмола облысы: Курорт-Бурабай, Шортанды, Макинка, Ақкөл;
Атырау облысы: Ганюшкино, Аққыстау;
Батыс Қазақстан облысы: Семиглавый Мар, Қазақстан, Шыңғырлау;
Қарағанды облысы: Қарағанды-Сортировочная, Жаңа Қарағанды, Нұра (сондай-ақ Қарағанды-Сортировочная станциясының жолаушылар платформасы);
Қостанай облысы: Аманқарағай, Құсмұрын;
Қызылорда облысы: Жаңақорған, Қазалы, Шиелі (сонымен қатар Талап станциясының платформасы);
Алматы облысы: Қонаев, Шамалған;
Жетісу облысы: Талдықорған;
Солтүстік Қазақстан облысы: Тайынша, Жаңаесіл, Саумалкөл;
Шығыс Қазақстан облысы: Риддер, Шемонаиха;
Павлодар облысы: Бозшакөл платформасы.
Көлік министрлігі алдағы уақытта да еліміздің барлық өңірінде жолаушылар инфрақұрылымын кезең-кезеңімен жаңғырту жұмыстарын жалғастырып, тұрғындарға қауіпсіз әрі жайлы қызмет көрсету сапасын арттыруды жоспарлап отыр.
