ADYM.KZ / Қазақстан Республикасы Ішкі істер министрлігінің Ұлттық ұланында әскери қызметшілерді психологиялық сүйемелдеуге арналған E-Nazar цифрлық жүйесі кезең-кезеңімен енгізілуде. Жаңа платформа психологиялық тестілеуді автоматтандырып, нәтижелерді өңдеу уақытын бірнеше есе қысқартуға мүмкіндік береді.
Ұлттық ұланның мәліметінше, бұрын психологиялық қорытындыны әзірлеуге шамамен екі сағат қажет болса, енді бұл процесс небәрі 10–15 минутта аяқталады. Сонымен қатар қағаз құжат айналымы 80 пайызға қысқарып, психолог мамандардың жалпы жұмыс уақыты шамамен 2000 сағатқа үнемделген.
E-Nazar жүйесі психологиялық тестілеуді өткізу, нәтижелерді автоматты түрде өңдеу және аналитикалық мәліметтерді қалыптастыру үдерістерін бір орталықтан басқаруға мүмкіндік береді. Платформа мерзімді әскери қызметшілерге, келісімшарт негізінде қызмет атқаратын әскери қызметкерлерге және офицерлік құрамға арналған.
Жүйенің басты артықшылықтарының қатарында дербес мәліметтердің жоғары деңгейде қорғалуы, ақпаратты өңдеу жылдамдығының артуы, қағазбастылықтың азаюы және психологтардың жұмыс жүктемесінің жеңілдеуі бар.
Жобаның ерекшелігі – оның электрондық психологиялық әдістемелерін Ұлттық ұланның әскери қызметшілері, ефрейтор Ким Хён У мен қатардағы Берікжан Бектұрсынов аға офицерлердің жетекшілігімен әзірлеген. Олар жасаған бағдарламалық өнім патенттеліп, оның жаңашылдығы мен тәжірибелік маңызы расталған.
E-Nazar жүйесі елордадағы №5573 әскери бөлімінде сынақтан сәтті өтіп, тиімділігін дәлелдеді. Енді жоба Қазақстан Республикасы ІІМ Ұлттық ұланының барлық әскери бөлімдерінде психологиялық мониторинг жүргізудің бірыңғай цифрлық құралы ретінде енгізілмек.
