ADYM.KZ / Қазақстанда 11–16 шілде аралығында жол-көлік оқиғаларының алдын алу және жол қозғалысына қатысушылардың тәртібін арттыру мақсатында «Қауіпсіз жол» жедел-профилактикалық іс-шарасы өтіп жатыр.
Ішкі істер министрлігінің мәліметінше, іс-шараның алғашқы үш күнінде жол қозғалысы ережелерін бұзудың 22,5 мыңнан астам дерегі анықталған.
Тіркелген құқық бұзушылықтардың ішінде көлік құралын мас күйде басқарудың 300-ден астам фактісі, қарсы бағытқа шығудың 260 дерегі, жолаушылар мен жүктерді тасымалдау қағидаларын бұзудың 854 жағдайы бар.
Сондай-ақ заңсыз жолаушы тасымалдаудың 139 дерегі анықталды. Оның ішінде 60-тан астамы такси қызметі саласына қатысты.
Іс-шара барысында 1,5 мыңнан астам көлік құралы арнайы айып тұрағына қойылды.
ІІМ Әкімшілік полиция комитетінің ерекше тапсырмалар жөніндегі аға инспекторы Ақтоты Боранованың айтуынша, жаз мезгілінде жол-көлік оқиғаларының, әсіресе кәмелетке толмағандардың қатысуымен болатын апаттардың алдын алу мақсатында жолдардағы бақылау күшейтіліп, автопатрульдер саны арттырылған.
Полиция азаматтарды жол қозғалысы ережелерін қатаң сақтауға, қауіпті маневрлерден бас тартуға және жолдағы қауіпсіздік әрбір жүргізуші мен жаяу жүргіншінің жауапкершілігі екенін ұмытпауға шақырды.
