ADYM.KZ / Қазақстанда 2025–2026 жылғы театр маусымы табысты аяқталды. Бір маусым ішінде ел театрлары 16 мыңнан астам спектакль ұсынып, көрермен назарына 410 жаңа қойылымды шығарды. Жалпы театрларға 2 832 835 адам келді.
Мәдениет саласындағы маңызды жетістіктердің бірі – театр репертуарының мазмұндық және жанрлық тұрғыдан кеңеюі болды. Маусымның ең елеулі премьералары қатарында «Астана Опера» театрындағы «Қыпшақ қызы Аппақ» операсы, Абай атындағы Қазақ ұлттық опера және балет театрындағы «Ұлы Жібек жолы» балеті, «Астана Балет» театрындағы «Кармина Бурана» балет-кантатасы, Қалибек Қуанышбаев атындағы Қазақ ұлттық музыкалық драма театрында сахналанған Әбіш Кекілбаевтың «Күй» драмасы және Михаил Лермонтов атындағы Ұлттық орыс драма театрындағы «Господа Головлевы» спектаклі бар.
Театр ұжымдары маусым бойы ел ішінде де, шетелде де белсенді гастрольдік сапарлар жасады. Осы кезеңде 539 гастроль ұйымдастырылып, қазақстандық театрлар 191 халықаралық және республикалық фестивальге қатысты. Бұл театр өнерінің кең аудиторияға жол тартып, шығармашылық ұжымдардың тәжірибе алмасуына мүмкіндік берді.
Қазақстандық театрлар халықаралық байқауларда да жоғары нәтижелер көрсетті. Ғабит Мүсірепов атындағы Қазақ мемлекеттік академиялық балалар мен жасөспірімдер театры Бішкекте өткен «ART-ORDO» халықаралық театр фестивалінде «Ұлпан» спектаклімен Гран-при иеленіп, бұдан бөлек төрт аталым бойынша марапатқа ие болды.
Сонымен қатар «Астана Опера» театрының El Voice вокалдық тобы Ставропольде өткен «Солдатский конверт» халықаралық байқау-фестивалінде Гран-при жеңіп алды. Ал театрдың скрипкашысы Бағдат Әбілханов Қытайдың Далянь қаласында өткен GRAND ART EXPRESS-CHINA халықаралық орындаушылық өнер байқауында І орынға ие болды.
Өткен театр маусымының қорытындысы қазақстандық театр өнерінің шығармашылық әлеуеті артып, халықаралық деңгейдегі беделі нығайып келе жатқанын көрсетті.
