ADYM.KZ / Қазақстандағы ақылы автомобиль жолдарын тұрақты пайдаланатын жүргізушілер абонемент рәсімдей алады. Ол үшін көлік құралы ақылы жол учаскесіне іргелес аудандардың бірінде тіркелуі және жол ақысы бойынша берешегі болмауы қажет. Көлік құралының тіркелген мекенжайы ҚР ІІМ деректер қоры арқылы тексеріледі.
Абонементті онлайн, клиенттермен жұмыс істеу орталықтарында немесе ақы төлеу пункттері арқылы рәсімдеуге болады.
Абонемент құны қандай?
Бір айлық абонемент жеңіл автокөліктерге қарастырылмаған. Ал автобустар мен жүк көліктері үшін тариф көлік санатына және жолдың санатына байланысты белгіленеді. Оның құны 1–10 АЕК аралығында, яғни 4 325 теңгеден 43 250 теңгеге дейін өзгереді.
Бір жылдық абонемент бойынша жеңіл автокөліктер үшін төлем 1 АЕК немесе 4 325 теңгені құрайды. Қалған көлік санаттары үшін тарифтер жолдың санатына қарай 12–100 АЕК аралығында белгіленген. Яғни абонемент құны 51 900 теңгеден 432 500 теңгеге дейін жетеді.
Абонементті қалай рәсімдеуге болады?
Абонементті бірнеше тәсілмен алуға мүмкіндік бар:
- 1403 байланыс орталығы арқылы. Алдымен көлік құралының есепшотына қажетті соманы енгізіп, кейін 1403 нөміріне хабарласып, қызметті қосу қажет.
- Kaztoll.kz сайты арқылы. Пайдаланушы сайтқа тіркеліп, көлік туралы мәліметтерді енгізгеннен кейін «Абонементті рәсімдеу» бөлімінен айлық немесе жылдық абонементті таңдай алады.
- Ақы төлеу пункттері немесе клиенттермен жұмыс істеу орталықтары арқылы. Бұл жағдайда операторға өтініш беріп, төлемді банк картасымен, қолма-қол ақшамен немесе интернет-банкинг арқылы жасауға болады.
Абонемент ақылы жолдарды тұрақты пайдаланатын жүргізушілер үшін жол ақысын төлеуді жеңілдетіп, бір учаскеде ұзақ мерзім бойы жүруге мүмкіндік береді.
