ADYM.KZ / Астанадағы Qazaq Creative Hub алаңында Креативті индустрияларды дамыту қоры ұйымдастырған Creative Aimaq республикалық жобасы аясында Қостанай облысының креативті жәрмеңкесі өтті. Бұл туралы Мәдениет және ақпарат министрлігі хабарлады.
Жәрмеңкеде Қостанай облысының тарихи-мәдени мұрасы, ұлттық қолөнер бұйымдары, жергілікті авторлық брендтер мен креативті индустрия өнімдері көпшілік назарына ұсынылды.
Іс-шара аясында «Алтын домбыра» иегері, айтыскер ақын Айбек Қалиевпен кездесу ұйымдастырылды. Келушілер ақынның жеке домбырасын, ұлттық музыкалық аспаптарды және Қостанай өңірінен шыққан тарихи тұлғаларға арналған арнайы экспозицияны тамашалады.
Сондай-ақ қостанайлық дизайнерлердің этностильдегі жаңа топтамалары көрсетіліп, Нью-Йорктегі MobFilm Festival халықаралық кинофестивалінің финалисі атанған «Қалам» мобильді фильмі таныстырылды. Бұдан бөлек, өңір жастары әзірлеген заманауи техникалық жобалар мен Қазақстандағы алғашқы студенттік болид көпшілікке ұсынылды.
Мәдени бағдарлама аясында еліміздегі алғашқы фольклорлық-этнографиялық ұжымдардың бірі – «Шертер» ансамблі өнер көрсетті. Ұжым орындаған халық әндері мен күйлері ұлттық музыкалық мұраны дәріптеді.
Министрліктің мәліметінше, жәрмеңкеге 1 320 адам қатысқан. Іс-шара барысында қостанайлық креаторлардың авторлық өнімдері жалпы 4 миллион 414 мың теңгеге сатылды.
