ADYM.KZ / Қызылорда облысының Арал қаласында жоғары сұрыпты ас тұзын өндіретін жаңа зауыттың ресми ашылу рәсімі өтті.
Іс-шараға облыс әкімі Мұрат Ергешбаев, облыс прокуроры Ризабек Ожаров, зиялы қауым өкілдері мен ел ағалары қатысты.
Аймақ басшысы тұрғындарды жаңа өндіріс орнының ашылуымен құттықтап, жобаның өңір экономикасы үшін маңызын атап өтті.
«Бұл – еліміздің экспорттық әлеуетін арттыратын, жаңа жұмыс орындарын ашуға мүмкіндік беретін маңызды жоба. Өндіріс орындарының дамуы экономиканы әртараптандыруға және тұрғындардың өмір сүру сапасын арттыруға оң әсер етеді деп сенемін», – деді Мұрат Ергешбаев.
Жаңа зауытты іске қосуға «Тоғыс – Аралотын» серіктестігі 1,8 млрд теңге инвестиция бағыттаған. Кәсіпорынның жылдық өндірістік қуаты – 40 мың тонна. Мұнда 20 адам тұрақты жұмыспен қамтылады.
Жобаға мемлекеттік қолдау көрсетіліп, кәсіпорынға 4 гектар жер телімі бөлініп, қажетті инфрақұрылым тартылған. Зауытта өндірілетін өнім ішкі нарықты қамтамасыз етіп қана қоймай, көршілес мемлекеттерге экспортталады.
Ашылу рәсімінде облыс прокуроры Ризабек Ожаров, ел ағалары Имамадин Оңғарбаев пен Нұралы Оспанов сөз сөйлеп, жобаны жүзеге асыруға үлес қосқан азаматтарға облыс әкімінің Алғыс хаттарын табыстады.
