ADYM.KZ / Биыл 1 шілдеден бастап күшіне енген жаңа Конституция тұрғын үйге қол сұқпаушылық пен жеке меншік құқығын қорғауды күшейтетін жаңа нормаларды бекітті. Енді ешкімді баспанасынан шығару немесе мүлкін сот шешімінсіз тартып алу мүмкін емес.
Жаңа талап тек тұрғын үй иелеріне ғана емес, тұрғын үйді заңды негізде пайдаланып жүрген азаматтарға, соның ішінде жалға алушыларға да қатысты.
Жылжымайтын мүлік нарығының сарапшысы Виталий Шалаевтың пікірінше, бұл өзгерістер жалға беру нарығын түбегейлі өзгертпегенімен, тараптарды құқықтық тұрғыдан сауатты әрекет етуге ынталандырады.
Оның айтуынша, бұдан былай ауызша келісімнің орнына заң талаптарына сай рәсімделген жалдау шартының маңызы арта түседі. Келісімшартта тараптардың құқықтары мен міндеттері, шартты бұзу тәртібі және тұрғын үйді босату талаптары нақты көрсетілсе, дау-дамайдың алдын алуға мүмкіндік көбейеді.
Сонымен бірге сарапшы жаңа норманы іс жүзінде қолдануға қатысты кейбір мәселелердің әзірге толық айқындалмағанын атап өтті. Атап айтқанда, егер жалға алушы келісімшарт талаптарын бұзып, тұрғын үйді өз еркімен босатудан бас тартса, меншік иесінің міндетті түрде сотқа жүгінуі қажет пе деген сұраққа сот тәжірибесі жауап береді.
Виталий Шалаевтың сөзінше, қабылданған өзгерістер жалға беру нарығын ашық әрі құқықтық тұрғыдан реттелген жүйеге көшіруге ықпал етеді. Бұл ретте заң талаптарына сай жасалған келісімшарттар тараптардың құқықтарын тиімді қорғаудың негізгі құралына айналады.
Сарапшының пікірінше, жаңа конституциялық норма жалға беру саласымен ғана шектелмейді. Ол жеке меншік құқығын да күшейтіп, азаматтардың мүлкін сот шешімінсіз тартып алуға жол бермейтін қосымша құқықтық кепілдік қалыптастырады.
