ADYM.KZ / Қазақстанның «Астана» футбол клубы UEFA Конференция лигасының бірінші іріктеу кезеңіндегі алғашқы матчта сырт алаңда Албанияның «Динамо Сити» командасын 1:0 есебімен жеңді.
Кездесу барысында қос команда да шабуылға жиі шығып, есеп ашуға ұмтылды. Алайда алғашқы таймда қақпаларға гол соғылған жоқ.
Екінші таймда қазақстандық клуб ойын тізгінін өз қолына алып, қауіпті шабуылдарды жиілетті. Матчтың 69-минутында Марио Томасовтың нәтижелі пасынан кейін Рамазан Каримов мергендік танытып, ойынның жалғыз голын соқты.
Осылайша, «Астана» екі матчтық текетірестің алғашқы ойынында жеңіске жетіп, келесі кезеңге өту жолында маңызды басымдыққа ие болды.
Қарымта кездесу 16 шілдеде Астанада өтеді.
Еске сала кетейік, бұған дейін Қазақстанның тағы бір өкілі – семейлік «Елімай» Конференция лигасының бірінші іріктеу кезеңіндегі алғашқы ойында Арменияның «Алашкерт» клубымен сырт алаңда 1:1 есебімен тең түсті.
Ал алматылық «Қайрат» UEFA Чемпиондар лигасының бірінші іріктеу кезеңіндегі алғашқы кездесуінде Черногорияның «Сутьеска» командасын 2:1 есебімен жеңген еді. Сонымен қатар Қостанайдың «Тобылы» Конференция лигасындағы жорығын екінші іріктеу кезеңінен бастап, Литваның «Паневежис» клубымен кездеседі.
