ADYM.KZ / Алматыда әлемге танымал актер Джеки Чан қатысатын Armour of God: Ultimatum («Доспехи бога: Ультиматум») халықаралық көркем фильмінің түсірілімін бастауға арналған ресми салтанат өтті.
Іс-шараға ҚР Премьер-министрінің орынбасары – Мәдениет және ақпарат министрі Аида Балаева, Алматы қаласының әкімі Дархан Сатыбалды, Алматы облысының әкімі Марат Сұлтанғазиев, сондай-ақ отандық және шетелдік киноиндустрия өкілдері қатысты.
Аида Балаева Джеки Чанның Қазақстан мен Қытай арасындағы мәдени-гуманитарлық байланыстарды дамытуға қосқан үлесін жоғары бағалап, актерді жаңа жобаның басталуымен құттықтады.
– Қазақстан мәдениетін әлемдік деңгейде танытуға және екі ел арасындағы мәдени-гуманитарлық ынтымақтастықты нығайтуға қосып отырған үлесіңіз үшін алғыс білдіремін. Алдағы түсірілім жұмыстарына сәттілік пен жаңа шығармашылық табыстар тілеймін, – деді министр.
Сапар аясында Джеки Чан Алматыдағы жас суретшілермен және Т. Жүргенов атындағы Қазақ ұлттық өнер академиясының түлектері – жас кинематографистермен кездесті. Ол жастарға шығармашылық ізденістен таймауға кеңес беріп, өз ісіне деген сүйіспеншілік пен табандылықтың маңызын атап өтті. Кездесу соңында балалар актерге өздері салған портреттерін сыйға тартты.
Салтанатты рәсімнің соңында қатысушылар дәстүрлі кинотүсірілім тақтайшасымен естелік суретке түсіп, фильм өндірісінің ресми басталғанын жариялады.
Жоба Қазақстан Республикасы Мәдениет және ақпарат министрлігі мен Қытайдың мемлекеттік China Film Group Corporation компаниясының қолдауымен жүзеге асырылып жатыр. Фильмді қазақстандық Sәlem Entertainment пен гонконгтік Billion Target компаниялары бірлесіп өндіреді.
Түсірілім жұмыстары 2026 жылдың шілде-қазан айлары аралығында Алматы қаласында, Алматы және Маңғыстау облыстарында өтеді. Фильмнің қоюшы режиссері – қазақстандық Роберт Кун.
Министрліктің мәліметінше, халықаралық прокатқа арналған бұл жоба Қазақстанның мәдени және туристік әлеуетін танытуға, кинотуризмді дамытуға, шетелдік серіктестермен ынтымақтастықты кеңейтуге және елді ірі халықаралық киножобаларды түсіруге қолайлы алаң ретінде ілгерілетуге ықпал етеді.
