ADYM.KZ / Орталық сайлау комиссиясы (ОСК) сайлауға байланысты қоғамдық пікірге сауалнама жүргізу туралы бес заңды тұлғадан хабарлама түскенін мәлімдеді.
Комиссияның хабарлауынша, аталған ұйымдар заң талаптарына сәйкес қажетті құжаттардың көшірмелерін ұсынып, қоғамдық пікірді зерттеу жұмыстарын жүргізуге рұқсат алған.
Сауалнама жүргізетін ұйымдар мыналар:
«Еуразиялық интеграция институты» ЖШС – жаппай сауалнама, фокус-топтық пікірталас, сараптамалық сауалнама, жедел сауалнама және exit poll әдістерін қолданады;
«DATAMETRICS» ЖШС – бетпе-бет (face-to-face) сұхбат жүргізеді;
«Қоғамдық саясат институты» жеке меншік мекемесі – бетпе-бет, телефон және интернет арқылы сауалнама жүргізіп, exit poll ұйымдастырады;
«Институт комплексных социальных исследований – Астана» жеке қоры – дауыс беру орындарынан тыс сауалнама, үздіксіз ағын әдісімен exit poll, жеке сұхбат және онлайн сауалнама өткізеді;
«Қазақстандық қоғамдық даму институты» КЕАҚ – бетпе-бет және телефон арқылы сауалнама жүргізіп, exit poll ұйымдастырады.
ОСК сайлау туралы заңнамаға сәйкес, бұқаралық ақпарат құралдары мен онлайн-платформалар қоғамдық пікір сауалдарының нәтижелерін жариялау кезінде зерттеуді жүргізген ұйымды, тапсырыс берушіні, сауалнама өткізілген уақытты, ақпарат жинау әдісін, сұрақтың нақты тұжырымын, респонденттер санын және ықтимал қателік деңгейін көрсетуге міндетті екенін еске салды.
Сонымен қатар сайлау алдындағы соңғы бес күнде және дауыс беру күні қоғамдық пікір сауалдарының нәтижелерін, сондай-ақ сайлау қорытындысына қатысты болжамдарды жариялауға тыйым салынады. Дауыс беру күні сайлау учаскелерінде қоғамдық пікірге сауалнама жүргізуге де жол берілмейді.
Комиссия бұл талаптарды бұзу қолданыстағы заңнамаға сәйкес әкімшілік жауапкершілікке әкелуі мүмкін екенін ескертті.
Бұған дейін Бас прокуратура да сайлау қарсаңында азаматтарға сайлау заңнамасының талаптарын сақтау қажеттігін еске салған болатын.
