ADYM.KZ / Алматылық «Қайрат» UEFA Чемпиондар лигасының бірінші іріктеу кезеңіндегі алғашқы ойынында Черногорияның «Сутьеска» клубын 2:1 есебімен жеңді.
Кездесу Алматыда өтті. Матчтың алғашқы минуттарынан-ақ алаң иелері ойын тізгінін өз қолына алып, қарсылас қақпасына қауіп төндіруге тырысты. Дегенмен «Сутьеска» қорғаныста сенімді ойнап, бірінші таймда есеп ашылған жоқ.
Екінші таймда да ойынның сипаты өзгерген жоқ. «Қайрат» шабуылды үдетіп, 76-минутта қорғаушы Лукас Африко есеп ашты. Алайда негізгі уақыттың соңында, 90-минутта қонақтар сапынан Марко Мрвальевич таразы басын теңестірді.
Матч тағдыры қосымша уақытта шешілді. 93-минутта Марк Гуаль жеңіс голын соғып, алматылық клубқа маңызды жеңіс сыйлады.
Осылайша «Қайрат» екі матчтан тұратын текетірестің алғашқы кездесуінде 2:1 есебімен басым түсті. Командалар арасындағы қарымта ойын 15 шілдеде Черногорияда өтеді.
Еске салайық, биыл Еурокубок додасында Қазақстан атынан Конференция лигасында елордалық «Астана» мен семейлік «Елімай» да бақ сынайды. Бірінші іріктеу кезеңінде «Астана» Албанияның «Динамо Сити» клубымен, ал «Елімай» Арменияның «Алашкерт» командасымен кездеседі.
