ADYM.KZ / Қазақстан Еуропалық одақпен ғылым, инновация, технологиялық кәсіпкерлік және жасанды интеллект салаларындағы ынтымақтастықты кеңейтуге ниетті.
Президент Қасым-Жомарт Тоқаевтың Бельгияға ресми сапары аясында Ғылым және жоғары білім министрі Саясат Нұрбек Еуропалық комиссияның Зерттеулер және инновациялар жөніндегі бас дирекциясы бас директорының орынбасары Мария Кристина Руссомен және Еуропалық инновациялар кеңесінің төрағасы Михил Схеффермен кездесті.
Келіссөздер барысында тараптар ғылыми зерттеулер, инновациялар және технологиялық кәсіпкерлік салаларындағы әріптестікті нығайту мәселелерін талқылады. Әсіресе Қазақстанның Еуропалық одақтың ірі ғылыми-зерттеу және инновациялық бағдарламасы – Horizon Europe бағдарламасына қауымдасу үдерісіне ерекше назар аударылды.
Министрліктің мәліметінше, бұл қадам қазақстандық жоғары оқу орындарына, ғылыми ұйымдар мен технологиялық компанияларға еуропалық зерттеу консорциумдарына қатысуға, бірлескен жобаларды жүзеге асыруға және Еуропалық зерттеу кеңістігімен ықпалдастықты арттыруға мүмкіндік береді.
Кездесулерде deep-tech бағыттарын дамыту, ғылыми әзірлемелерді коммерцияландыру, стартаптарды қолдау, сондай-ақ ғылым мен өнеркәсіп салаларында жасанды интеллект технологияларын қолдану мәселелері де көтерілді. Бұдан бөлек, еуропалық серіктестермен бірлескен инновациялық бастамаларды іске асыру перспективалары талқыланды.
Министрлік бұл кездесулерді Қазақстанның Horizon Europe бағдарламасына қауымдасу бастамасын ілгерілетудегі және Еуропалық одақпен инновациялық ынтымақтастықты кеңейтудегі маңызды кезең деп бағалады.
Ведомствоның мәлімдеуінше, Қазақстан жекелеген ғылыми жобаларға қатысумен шектелмей, отандық университеттерді, ғылыми-зерттеу ұйымдарын, стартаптар мен технологиялық компанияларды еуропалық зерттеулер, инновациялар және deep-tech экожүйесіне толыққанды кіріктіруді мақсат етеді.
Осы бағытта Еуропалық комиссиямен және Еуропалық инновациялар кеңесімен практикалық ынтымақтастықты дамыту басым міндеттердің бірі болмақ.
