ADYM.KZ / Қазақстандық теннисші Соня Жиенбаева Португалияның Элвас қаласында өтіп жатқан ITF W50 санатындағы турнирдің жұптық сынында жартылай финалға жолдама алды.
20 жасқа енді ғана толған қазақстандық спортшы литвалық Ивета Дапкутемен бірге ширек финалда турнирдің үшінші нөмірлі жұбы — словакиялық Катерина Кузмова мен нидерландылық Стефани Джудит Виссхерге қарсы ойнады.
Кездесудің алғашқы партиясында қарсыластар 6:3 есебімен басым түсті. Алайда екінші сетте Жиенбаева мен Дапкуте таразы басын теңестіріп, 6:2 есебімен жеңіске жетті. Жеңімпаз супер тай-брейкте анықталып, қазақстандық-литвалық жұп 10:6 есебімен басым болды.
1 сағат 16 минутқа созылған матчтың нәтижесінде Соня Жиенбаева мен Ивета Дапкуте турнирдің жартылай финалына шықты.
Енді олар финал жолдамасын үндістандық Вайшнави Адкар мен Рутуя Бхосалеге қарсы кездесуде сарапқа салады.
Айта кетейік, Соня Жиенбаева осы турнирдің жекелей сынының алғашқы айналымында дәл осы Вайшнави Адкардан үш сетке созылған матчта 2:6, 6:4, 2:6 есебімен жеңілген болатын.
Бұған дейін Уимблдон турнирінде қазақстандық Анна Данилина жұптық сында Юлия Путинцевамен өткен кездесуде жеңіске жеткені хабарланған еді. Сондай-ақ Елена Рыбакина үшінші айналымға сенімді түрде жолдама алып, Александр Бублик те жарыстың үшінші кезеңіне өтті.
