Мемлекет басшысы Қасым-Жомарт Тоқаев бұқаралық ақпарат құралдары қызметкерлерін марапаттау рәсімінде сөз сөйлеп, журналистиканың қоғамдағы орны мен медиа саласының алдында тұрған негізгі міндеттерге тоқталды, деп хабарлайды Adym.kz ақпараттық сайты Ақордаға сілтеме жасап.
Президенттің айтуынша, журналистер – қоғамның жаршысы әрі шынайы жанашыры. Қазіргі технологиялық дәуірде азаматтарды жедел, сапалы және шынайы ақпаратпен қамтамасыз ету, сондай-ақ маңызды мәселелерге кәсіби сараптама ұсыну – БАҚ өкілдерінің басты міндеті.
Мемлекет басшысы кәсіби журналистика даңғаза мен жасанды сенсацияға емес, терең талдау мен жауапкершілікке негізделуі керек екенін атап өтті. Оның сөзінше, дәстүрлі медиа өз маңызын жоғалтқан жоқ, керісінше жаңа технологияларға бейімделіп, мультимедиялық платформалар арқылы дамып келеді.
Президент цифрлық кеңістіктегі жалған ақпарат, дипфейк технологиялары мен қоғамдық пікірді манипуляциялауға бағытталған қауіптерге ерекше назар аударды. Ол медиа қауымдастықты мұндай сын-қатерлерге қарсы тұруға және қоғамның бірлігі мен тұрақтылығын сақтауға атсалысуға шақырды.
Қасым-Жомарт Тоқаев Қазақстанда сөз бостандығы мен пікір алуандығына кепілдік берілгенін атап өтті. Сонымен бірге сөз еркіндігі жауапкершілікпен ұштасуы тиіс екенін айтып, құқықтық нигилизмге, радикализмге және қоғам құндылықтарына қайшы келетін әрекеттерге жол бермеудің маңызын жеткізді.
Президент жастардың медиакеңістіктен жасанды сән-салтанат пен даңғазаны емес, еңбекқорлықтың, адал табыстың және мәдениеттің үлгісін көруі қажет екенін айтты.
Мемлекет басшысы журналистерді әлеуметтік қолдау шараларына да тоқталды. Оның мәліметінше, соңғы үш жылда Астана қаласында 200 журналист баспанамен қамтылған. Биыл алғаш рет өңірлік БАҚ өкілдеріне де пәтер кілттері табысталмақ.
«Биыл бүкіл ел бойынша ақпарат саласының 66 қызметкері баспанамен қамтамасыз етіледі», – деді Президент.
Сөз соңында Мемлекет басшысы журналистер шындықты боямасыз көрсететін айна ғана емес, ұлтты өркениетке жетелейтін ағартушылық миссияны да атқаруы тиіс екенін атап өтті.
