ADYM.KZ / Ақтөбе облысында ұзақ уақыт бойы игерілмеген 36,6 мың гектар ауыл шаруашылығы мақсатындағы жер телімі сот шешімімен мемлекет меншігіне қайтарылды. Бұл туралы Ауыл шаруашылығы министрлігі хабарлады.
Ведомство мәліметінше, Ауыл шаруашылығы министрлігі Жер ресурстарын басқару комитетінің Ақтөбе облысы бойынша Жер ресурстарын басқару департаменті ауыл шаруашылығы жерлерін тиімді пайдалану және пайдаланылмай жатқан учаскелерді мемлекет меншігіне қайтару жұмыстарын жүйелі түрде жүргізіп келеді.
Жоспардан тыс тексеру барысында Шалқар ауданында орналасқан, жалпы аумағы 36 600 гектар болатын ауыл шаруашылығы мақсатындағы жер телімінің ұзақ уақыт бойы нысаналы мақсатына сәйкес пайдаланылмағаны анықталған.
Анықталған заң бұзушылықтарды жою үшін жер пайдаланушыға жер заңнамасының талаптарын орындау жөнінде нұсқама берілген. Алайда белгіленген мерзімде талаптар орындалмаған.
Осыған байланысты Жер ресурстарын басқару департаменті жер учаскесін мәжбүрлеп алып қою туралы талап-арызбен Ақтөбе облысының мамандандырылған ауданаралық экономикалық сотына жүгінді.
Сот талап-арызды толық көлемде қанағаттандырып, аталған жер телімін мемлекет меншігіне қайтару туралы шешім шығарды.
Ауыл шаруашылығы министрлігінің мәліметінше, пайдаланылмай жатқан ауыл шаруашылығы жерлерін анықтау және оларды мемлекет меншігіне қайтару жұмыстары алдағы уақытта да жалғасады әрі тұрақты бақылауда болады.
