ADYM.KZ / Қазақстандықтар енді «Әділет» партиясына бірнеше минут ішінде онлайн форматта өтініш жолдап, ұсыныс енгізіп, заң бұзушылық туралы хабарлап немесе партия қатарына қосыла алады. Азаматтарға қолайлы жағдай жасау мақсатында партия өтінім қабылдаудың бірыңғай цифрлық сервисін іске қосты.
Жаңа платформаны «Әділет» партиясының төрағасы Айбек Дәдебай тау-кен металлургия кешенін дамыту мәселелеріне арналған Іскерлік кеңес отырысында таныстырды.
Партия мәліметінше, цифрлық сервис қоғамдық қабылдаулар, жеке қабылдаулар және жазбаша өтініштермен қатар азаматтармен байланыс орнатудың қосымша тетігіне айналады. Платформаға партияның ресми сайты немесе бірыңғай QR-код арқылы кіруге болады.
Жаңа сервис арқылы азаматтар партияның саяси бағдарламасымен танысып, партия қатарына онлайн түрде қосыла алады. Сондай-ақ өтініш жолдап, түрлі бастамалар ұсынып, заң бұзушылықтар туралы хабарлап немесе көмек сұрауға мүмкіндік алады.
Өтінімдерді қарау үдерісін жеңілдету үшін барлық өтініш 26 бағыттан тұратын бірыңғай тақырыптық рубрикатор бойынша жүйеленген. Оның ішінде мемлекеттік басқару, цифрландыру, денсаулық сақтау, білім беру, әлеуметтік қорғау, экономика, кәсіпкерлік, тұрғын үй-коммуналдық шаруашылығы, көлік, экология, ауыл шаруашылығы және азаматтардың құқықтарын қорғау секілді негізгі салалар қамтылған.
Айбек Дәдебайдың айтуынша, жаңа платформаның іске қосылуы Қазақстанның цифрлық трансформация бағытына толық сәйкес келеді. Оның сөзінше, цифрлық технологиялар мемлекеттік институттардың тиімділігін арттырып, азаматтардың өтініштеріне жедел жауап беруге мүмкіндік береді.
Өтінім беру тәртібі барынша жеңілдетілген. Ол үшін пайдаланушы QR-кодты сканерлеуі немесе партияның ресми сайтына кіріп, қажетті сервисті таңдауы керек. Одан кейін eGov Mobile қосымшасы арқылы электрондық цифрлық қолтаңбамен жеке басын растаған соң өтінім жолдай алады.
Жүйе өтінім тіркелгеннен кейін автоматты түрде бірегей тіркеу нөмірін береді. Қарау нәтижесі бойынша азаматқа көрсетілген байланыс деректері арқылы ресми жауап жіберіледі.
Партия өкілдерінің айтуынша, жаңа цифрлық сервис азаматтармен, бизнес қауымдастығымен және сарапшылармен тұрақты кері байланыс орнатуға, жүйелі мәселелерді анықтауға және заңнамалық әрі басқарушылық шешімдер әзірлеу кезінде қоғам ұсыныстарын ескеруге мүмкіндік береді.
