ADYM.KZ / Мемлекет басшысы Қасым-Жомарт Тоқаев домбыраның ұлттық мәдениетті сақтау мен ұлттың рухани болмысын нығайтудағы ерекше маңызын атап өтті. Бұл туралы Президент Парламент палаталарының бірлескен отырысында сөйлеген сөзінде айтты.
Президенттің сөзінше, жаңашыл әрі жасампаз мемлекет қалыптастыру үшін ең алдымен ұлттық құндылықтарды, бай тарих пен мәдени мұраны сақтау қажет.
«Бірнеше күннен кейін бәріміз бір ел болып Ұлттық домбыра күнін атап өтеміз. Бұл – болмысымызды айшықтайтын, халқымыздың, әсіресе, өскелең ұрпақтың рухын көтеретін ерекше мереке. Қадыр Мырза Әлінің “Нағыз қазақ – домбыра” деп жырлауы тегін емес. Домбыраны ұлықтау арқылы төл өнерімізді төрге оздырамыз. Домбыра қастерлі құндылығымыз ретінде Қазақстанды әлемге танытатын бірегей ұлттық брендке айналуы керек», – деді Қасым-Жомарт Тоқаев.
Мемлекет басшысы мәдениет саласын дамыту мемлекеттік саясаттың басым бағыттарының бірі екенін атап өтті. Оның айтуынша, тарихи-мәдени мұраны сақтау, ұлттық өнерді дамыту, музейлердің, театрлардың, кітапханалардың және концерттік ұйымдардың жұмысын қолдау, сондай-ақ қазақ мәдениетін халықаралық деңгейде насихаттау жұмыстары тұрақты түрде жалғасады.
Президент мәдениетті адами капиталды дамытудың негізгі тетіктерінің бірі ретінде бағалады. Ол қазіргі таңда елдің бәсекеге қабілеттілігі ең алдымен адам әлеуетінің сапасына байланысты екенін айтты.
Осыған байланысты әлеуметтік саланы дамытуға ерекше көңіл бөлініп отыр. Биыл ғылым мен білімге, мәдениетке, денсаулық сақтау, спорт және әлеуметтік қолдау салаларына 19 триллион теңгеден астам қаржы қарастырылған. Бұл – республикалық бюджет шығыстарының жартысынан астамын құрайды.
