ADYM.KZ / Мемлекет басшысы Қасым-Жомарт Тоқаев Ақмола облысының Щучинск қаласында өтіп жатқан «Айбын» XII халықаралық әскери-патриоттық жастар жиынына қатысты.
Ақорданың мәліметінше, биылғы «Айбын-2026» бағдарламасы әскери-спорттық, интеллектуалдық, шығармашылық және әскери-қолданбалы спорт түрлері бойынша жарыстарды қамтыды. Іс-шараға Қазақстанның әр өңірінен, сондай-ақ Әзербайжан, Қырғызстан, Ресей және Өзбекстаннан келген 50-ден астам команда қатысты.
Президент бұл жиынның жас ұрпақтың рухын шыңдап, отансүйгіштікке тәрбиелеудегі маңызын атап өтті.
«Кез келген елдің болашағы – отаншыл, білімді, еңбекқор және батыл жастардың қолында. Қазақстанның беделін арттырып, көшін алға бастайтын да – жалынды жастар», – деді Мемлекет басшысы.
Қасым-Жомарт Тоқаев қатысушыларға ризашылығын білдіріп, мұндай халықаралық алаңдардың елдер арасындағы достық пен ынтымақтастықты нығайтатынын айтты.
Айта кетейік, жиынға қатысушылар бірқатар әскери-спорттық және интеллектуалдық сайыстарда өзара бақ сынасты.
