ADYM.KZ / Қазақстандық танымал шахматшы, гроссмейстер Бибісара Асаубаева Мемлекет басшысының атынан ІІ дәрежелі «Барыс» орденімен марапатталды.
Мемлекеттік награданы ҚР Премьер-министрінің орынбасары – Мәдениет және ақпарат министрі Аида Балаева табыстады.
Салтанатты рәсімде Аида Балаева Бибісара Асаубаеваның қазақстандық шахматтың дамуына, зияткерлік спорт түрлерін жастар арасында кеңінен насихаттауға және еліміздің халықаралық аренадағы беделін арттыруға қосқан елеулі үлесін ерекше атап өтті.
Бибісара Асаубаева – Қазақстанның ең табысты шахматшыларының бірі. Ол блиц шахматынан үш дүркін әлем чемпионы атанып, осы жетістікке қол жеткізген ең жас шахматшы ретінде Гиннестің рекордтар кітабына енген. Сондай-ақ жуырда Норвегияда өткен беделді Norway Chess супертурнирінде жеңімпаз атанып, халықаралық деңгейдегі тағы бір маңызды жетістікке қол жеткізді.
Марапат алғаннан кейін шахматшы өзінің Telegram-арнасында ІІ дәрежелі «Барыс» орденін көптен күткенін айтып, қуанышымен бөлісті.
«Мен көптен күткен ІІ дәрежелі «Барыс» орденін алдым. Бұған дейін ІІІ дәрежелі орденім болған. Енді І дәрежелі орденді алсам, осы награданың толық кавалері атанамын. Қараңыздаршы, қандай әдемі орден», – деді Бибісара Асаубаева.
Айта кетейік, ІІ дәрежелі «Барыс» ордені мемлекеттілікті нығайтуға, қоғамдық және әлеуметтік-мәдени қызметке сіңірген ерекше еңбегі, сондай-ақ халықтар арасындағы ынтымақтастық пен мемлекеттер арасындағы достық қарым-қатынасты дамытуға қосқан үлесі үшін табысталады.
