ADYM.KZ / Қазақстандық аралас жекпе-жек шебері Асу Алмабаев UFC тарихында «Кештің үздік өнері» (Performance of the Night) үшін 100 мың АҚШ доллары көлеміндегі бонусты иеленген алғашқы қазақстандық спортшы атанды.
Әзербайжанның Баку қаласында өткен UFC Fight Night 280 турнирінде Алмабаев америкалық Чарльз Джонсонды үшінші раундта ауырту әдісімен мерзімінен бұрын жеңді. Жарқын өнер көрсеткен қазақстандық файтер ұйым тарапынан кештің үздік спортшыларының бірі деп танылып, 100 мың доллар көлеміндегі арнайы бонусқа ие болды.
Айта кетейік, биылғы қаңтардан бастап UFC «Кештің үздік өнері» үшін берілетін сыйақы мөлшерін 50 мың доллардан 100 мың долларға дейін ұлғайтқан болатын. Осылайша Асу Алмабаев жаңа форматтағы бонусты алған алғашқы қазақстандық файтер ретінде ұйым тарихына енді.
Бұл жеңістен кейін Асу Алмабаевтың UFC-дегі көрсеткіші 8 жекпе-жекте 7 жеңіс және 1 жеңіліске жетті. Оның UFC-дегі жалғыз жеңілісі 2025 жылдың наурыз айында португалиялық Манел Капеден болған.
