ADYM.KZ / Қазақстанда бидай импортына алты ай мерзімге уақытша шектеу енгізу жоспарланып отыр. Бұл туралы Ауыл шаруашылығы министрлігі әзірлеген бұйрық жобасы «Ашық НҚА» порталында жарияланды.
Құжат 2026 жылғы 26 маусымда өткен Сыртқы сауда саясаты мәселелері жөніндегі ведомствоаралық комиссияның шешімі негізінде әзірленген.
Жобаға сәйкес, шектеу автомобиль, теміржол және су көлігі арқылы Еуразиялық экономикалық одаққа (ЕАЭО) мүше мемлекеттерден де, үшінші елдерден де импортталатын бидайға қолданылады.
Сонымен бірге бірқатар кәсіпорындарға жеңілдік қарастырылған. Атап айтқанда, теміржол арқылы бидайды құс шаруашылығы кәсіпорындары, астық өңдеуші кәсіпорындар, лицензияланған элеваторлар және «Азық-түлік келісімшарт корпорациясы» ҰК» АҚ импорттай алады.
Алайда мұндай тәртіппен әкелінген астық тек өндірістік қажеттіліктерге пайдаланылуы тиіс. Оны ішкі немесе сыртқы нарықта сатуға рұқсат етілмейді.
Сондай-ақ Қазақстан аумағы арқылы өтетін теміржол транзитіне және республика арқылы жүзеге асырылатын ЕАЭО елдері арасындағы тасымалдарға бұл шектеу қолданылмайды.
Ауыл шаруашылығы министрлігінің мәліметінше, уақытша шектеу отандық бидай өндірушілерін қолдауға, ішкі нарықтағы қазақстандық астықтың өткізілуін қамтамасыз етуге бағытталған.
Ведомствоның пікірінше, бұйрық жобасын қабылдау әлеуметтік-экономикалық немесе құқықтық тұрғыдан теріс салдарға әкелмейді.
