ADYM.KZ / Мәжіліс «Қазақстан Республикасының кейбір заңнамалық актілеріне экология және экономиканың жекелеген салаларын жетілдіру мәселелері бойынша өзгерістер мен толықтырулар енгізу туралы» заңға Сенат ұсынған түзетумен келісіп, құжатты Мемлекет басшысының қол қоюына жолдады.
Заң аясында экологиялық саланы цифрландыру, қалдықтарды басқару және қайта өңдеу жүйесін жетілдіру, климаттық реттеу тетіктерін дамыту, көміртегі офсеті институтын жетілдіру, Ұлттық гидрометеорологиялық қызметтің жұмысын жақсарту, сондай-ақ экологиялық бақылаудың тиімділігін арттыру көзделген.
Сонымен қатар құжатта мемлекеттік экологиялық сараптама жүргізу мен қоғамдық тыңдаулар өткізу тәртібіне қатысты бірқатар нормалар нақтыланып, киік дериваттарын сату жүйесінің операторын айқындау және оларды өткізу тәртібін реттеу мәселелері қарастырылған.
Мәжілістің жалпы отырысында депутат Еділ Жаңбыршин Сенат енгізген түзету Қазақстан ратификациялаған Париж келісімінің 6-бабын іске асыруға бағытталғанын айтты.
«Бұл түзетудің қабылдануы елімізге инвестициялар мен заманауи технологияларды тартуға, жаңа жұмыс орындарын ашуға, экономиканы декарбонизациялауға және экологиялық ахуалды жақсартуға ықпал етеді», – деді депутат.
Оның айтуынша, бұл заң Мәжілістің осы сессиядағы қорытынды жалпы отырысында қабылданған соңғы құжаттардың бірі болды.
Айта кетейік, осы аптада Сенат аталған заңды екінші оқылымда қарап, оның бір бабын жаңа редакцияда қабылдап, Мәжіліске қайта жолдаған болатын. Мәжіліс депутаттары Сенаттың түзетуін қолдап, заңды Президенттің қол қоюына жіберу туралы шешім қабылдады.
