Қытайда аса ірі көлемде пара алды деп айыпталған бұрынғы жоғары лауазымды шенеунік өлім жазасына кесілді, деп хабарлайды Adym.kz ақпараттық сайты Синхуа агенттігіне сілтеме жасап.
Цзянси провинциясының Наньчан қалалық соты Шанхай партия комитеті тұрақты комитетінің бұрынғы мүшесі Чжу Чжисонға қатысты үкім шығарды. Ол аса ірі көлемде пара алғаны үшін екі жылға кейінге қалдырылған өлім жазасына кесілді.
Тергеу деректеріне сәйкес, Чжу Чжисон 2003 жылдан 2024 жылға дейін қызметтік өкілеттігін жеке пайдасына пайдаланған. Ол түрлі ұйымдар мен кәсіпкерлерге бизнес жүргізу, құрылыс жобалары бойынша келісімшарттар алу, несие және қаржыландыру мәселелерін шешуге көмектескен.
Осы қызметтері үшін экс-шенеунік жеке өзі және делдалдар арқылы ақша мен өзге де мүлік түрінде сыйақы алып отырған. Тергеу материалдарына сәйкес, алынған параның жалпы көлемі 139 миллион юаньнан асып, шамамен 19,46 миллион долларды құраған.
Сот үкімімен Чжу Чжисон саяси құқықтарынан өмір бойына айырылып, оның барлық жеке мүлкі тәркіленді. Заңсыз жолмен алынған қаражат мемлекет кірісіне аударылды.
Сот жазаны екі жылға кейінге қалдыру туралы шешімді бірқатар жеңілдететін мән-жайлармен түсіндірді. Атап айтқанда, сотталушы өз кінәсін толық мойындап, тергеумен ынтымақтасқан және бұған дейін белгісіз болған сыбайлас жемқорлық фактілері туралы ақпарат берген. Сондай-ақ оның көмегімен заңсыз алынған активтердің едәуір бөлігі қайтарылған.
Қытай заңнамасына сәйкес, екі жылдық сынақ мерзімі ішінде жаңа қылмыс жасалмаған жағдайда мұндай жаза әдетте өмір бойына бас бостандығынан айыру жазасымен алмастырылады. Кейін сотталушының мінез-құлқына қарай жаза мерзімі қайта қаралуы мүмкін.
Айта кетейік, бұған дейін Қытайда сыбайлас жемқорлық қылмыстары үшін тағы бір жоғары лауазымды шенеунікке өлім жазасы тағайындалғаны хабарланған болатын.
