ADYM.KZ / Қазақстан мен Қытай кітапхана саласындағы әріптестікті нығайтып, тәжірибе алмасу мен бірлескен жобаларды кеңейтуге ниетті.
Бейжіңдегі Қазақстан мәдениет орталығында Қазақстан мен Қытайдың кітапхана саласы мамандарының қатысуымен жұмыс кездесуі өтті. Іс-шара Қазақстан Ұлттық кітапханасы мен Қытай Халық Республикасының Ұлттық және көпшілік кітапханалары өкілдерінің басын қосты.
Кездесу Қазақстанда кітапхана жүйесін жаңғырту, жаңа форматтағы кітапханалар құру, қоғамдық кеңістіктерді дамыту және саланы цифрландыру бағытындағы мемлекеттік міндеттер аясында ұйымдастырылды.
Тараптар кітапхана қорларын сақтау және қалпына келтіру, цифрлық технологияларды енгізу, қызмет көрсету сапасын арттыру және заманауи басқару тәсілдерін қолдану мәселелерін талқылады.
Қытайлық мамандар кітапханаларды басқару, инновациялық қызмет көрсету және заманауи технологияларды пайдалану бағытындағы тәжірибелерімен бөлісті. Ал қазақстандық тарап елімізде кітапхана саласын жаңғырту бойынша жүзеге асырылып жатқан жобалар мен бастамалар туралы ақпарат ұсынды.
Кездесу қорытындысында екі елдің мамандары кәсіби байланыстарды одан әрі дамытуға, тәжірибе алмасуды жалғастыруға және кітапхана ісін жетілдіруге бағытталған бірлескен жобаларды жүзеге асыруға дайын екендіктерін жеткізді.
