Мемлекет басшысы Қасым-Жомарт Тоқаев Ішкі істер министрі Ержан Сәденовті қабылдады. Кездесу барысында Президентке елдегі криминогендік ахуал, қоғамдық қауіпсіздікті қамтамасыз ету және ішкі істер органдарының алдына қойылған міндеттердің орындалуы жөнінде есеп берілді, деп хабарлайды Adym.kz ақпараттық сайты Ақордаға сілтеме жасап.
Ержан Сәденовтің мәліметінше, 2026 жылдың алғашқы бес айында тіркелген қылмыстар саны өткен жылдың сәйкес кезеңімен салыстырғанда 9 пайызға азайған. Сонымен қатар негізгі санаттар бойынша құқықбұзушылық деңгейі төмендеп, қылмыстарды ашу көрсеткіші артқан.
Министр қоғамдық қауіпсіздікті сақтау мен құқықбұзушылықтың алдын алу бағытындағы жұмыстарға ерекше назар аударылып отырғанын айтты. Оның сөзінше, ведомство жазаның бұлтартпастығы қағидатын дәйекті түрде қамтамасыз етіп келеді. Есепті кезеңде өткен жылдары жасалған 1685 қылмыс ашылып, сот төрелігінен жасырынған 574 қылмыскер ұсталған. Олардың 89-ы шетел аумағында анықталған.
Сондай-ақ министр киберқылмысқа, есірткі қылмысына, ұйымдасқан қылмысқа және экстремизмге қарсы күрес нәтижелері туралы баяндады. Бұл бағытта қылмыстық топтардың әрекетінің жолын кесу, азаматтарды түрлі қауіп-қатерден қорғау және қауіпсіздік саласындағы халықаралық ынтымақтастықты дамыту бойынша кешенді шаралар жүзеге асырылып жатыр.
Кездесу қорытындысында Мемлекет басшысы қоғамдық қауіпсіздік пен құқықтық тәртіпті нығайту мақсатында «Заң мен тәртіп» қағидатын іс жүзінде тиімді жүзеге асыру жөнінде бірқатар нақты тапсырма берді.
