ADYM.KZ / АҚШ президенті Дональд Трамп пен Украина президенті Владимир Зеленский G7 саммиті аясында қысқаша кездесу өткізіп, алдағы негізгі келіссөздерді жалғастыруға уағдаласты.
Reuters агенттігінің хабарлауынша, екі ел басшысы Францияда өтіп жатқан саммит барысында пікір алмасқан. Дональд Трамп журналистерге Владимир Зеленскиймен ресми кездесу өткізетінін айтып, алдын ала әңгіме сәтті өткенін жеткізді.
«Әңгіме жақсы өтті», – деді АҚШ президенті.
Сонымен қатар Трамп Ресей мен Украина арасындағы соғыс екі тарапқа да ауыр зардап әкеліп отырғанын атап өтіп, Мәскеудің келіссөздерге келуі маңызды екенін мәлімдеді.
Өз кезегінде Владимир Зеленский әлеуметтік желідегі парақшасында кездесу сәтінен түсірілген фотосуреттерді жариялады. Суреттерде Украина Ұлттық қауіпсіздік және қорғаныс кеңесінің хатшысы Рустем Умеровтың Дональд Трамппен және АҚШ мемлекеттік хатшысы Марко Рубиомен әңгімелесіп отырғаны көрінеді.
«Ұстанымдарды үйлестіру әрдайым маңызды», – деп жазды Украина президенті.
Бұған дейін Reuters агенттігі Трамп пен Зеленскийдің Еуропа көшбасшыларымен бірге G7 саммиті аясындағы жұмыс отырысына қатысқанын хабарлаған болатын.
G7 саммиті 15-17 маусым аралығында Францияда өтіп жатыр. Жиынға Франция, Ұлыбритания, Канада, Германия, Италия, Жапония және АҚШ көшбасшыларымен қатар Еуропалық одақ өкілдері қатысуда.
Reuters мәліметінше, еуропалық дипломаттар саммитті АҚШ әкімшілігін Украинадағы соғысты тоқтатуға қатысты бастамаларды қолдауға ынталандыратын маңызды алаң ретінде қарастырып отыр.
