ADYM.KZ / Қазақстанда жаңа халықаралық банк жұмысын бастауы мүмкін. Бұл мәселе Қаржы нарығын реттеу және дамыту агенттігінің төрағасы Мәдина Әбілқасымова мен Abu Dhabi Commercial Bank PJSC (ADCB) өкілдерінің кездесуінде талқыланды.
Тараптар «Abu Dhabi Commercial Bank (Kazakhstan)» АҚ-ын құру және іске қосу кезеңдерін, сондай-ақ Қазақстан заңнамасына сәйкес банктік лицензия алу мәселелерін қарастырды.
Бұған дейін Қаржы нарығын реттеу және дамыту агенттігі ADCB-ге Қазақстан аумағында еншілес банк құруға және банк холдингі мәртебесін алуға рұқсат берген болатын. Нәтижесінде жаңа қаржы ұйымы 2026 жылғы 20 сәуірде ресми түрде мемлекеттік тіркеуден өтті.
Жаңа банктің ерекшелігі дәстүрлі банктік қызметтермен қатар исламдық қаржыландыру құралдарын дамытуға басымдық беруі. Атап айтқанда, қаржы ұйымы «ислам терезесі» тетігі арқылы пайызсыз қаржыландыру қызметтерін ұсынуды жоспарлап отыр.
Реттеуші органның пікірінше, халықаралық ірі банктің Қазақстан нарығына келуі банк секторындағы бәсекелестікті күшейтіп, халық пен бизнеске ұсынылатын қаржылық қызметтердің сапасы мен түрлерін кеңейтуге мүмкіндік береді. Сонымен қатар бұл ел экономикасына қосымша халықаралық капитал тартуға ықпал етпек.
ADCB — Біріккен Араб Әмірліктеріндегі ең ірі қаржы институттарының бірі. Банктің негізгі акционері — Mubadala Investment Company. Қаржы ұйымы халықаралық рейтинг агенттіктерінен жоғары бағалар алған және актив көлемі бойынша БАӘ-дегі жетекші банктердің қатарына кіреді.
Қазіргі уақытта Қазақстанның банк секторында 23 банк жұмыс істейді, оның 10-ы шетелдік еншілес қаржы ұйымдары. Сарапшылардың пікірінше, жаңа банктің толыққанды іске қосылуы елдегі исламдық қаржы нарығының дамуына қосымша серпін беруі мүмкін.
