ADYM.KZ / Сенаттың жалпы отырысында «Қазақстан Республикасының кейбір заңнамалық актілеріне нотариаттық қызмет және заң көмегі мәселелері бойынша өзгерістер мен толықтырулар енгізу туралы» заң екі оқылымда қаралып, мақұлданды.
Сенатор Советбек Медебаевтың айтуынша, заңның негізгі мақсаты – нотариат туралы заңнаманы жетілдіру, нотариаттық қызметке мемлекеттік бақылаудың тиімділігін арттыру, заңдылықтың сақталуын қамтамасыз ету және көрсетілетін қызметтердің сапасын көтеру.
Заңға сәйкес, нотариат қызметіне бақылау жүргізу тәртібі Кәсіпкерлік кодекстен алынып, «Нотариат туралы» салалық заң аясында реттеледі.
Сондай-ақ мемлекеттік және квазимемлекеттік сатып алу шарттары бойынша атқарушылық жазбаларды енді нотариустар емес, соттар бұйрықтық іс жүргізу тәртібімен қарайтын болады.
Бұдан бөлек, Бірыңғай нотариаттық ақпараттық жүйеде атқарушылық жазба жасау туралы өтініштер нотариустар арасында автоматты түрде бөлінеді. Бұл жүйе процестің ашықтығын қамтамасыз етіп, нотариустар арасындағы жүктемені теңестіруге және мүдделер қақтығысы мен сөз байласу тәуекелдерін азайтуға мүмкіндік береді. Сонымен қатар, атқарушылық жазбалар тек борышкердің тіркелген жері бойынша рәсімделеді.
Заң нотариустардың жауапкершілігін де күшейтеді. Атап айтқанда, лицензияның қолданылуын тоқтата тұру және одан айыру негіздері кеңейтіледі.
Құжатта нотариат институтын цифрландыруға бағытталған бірқатар жаңашылдық қарастырылған. Соның ішінде электрондық нотариаттық құжаттарды жинақтау, сақтау және есепке алуға арналған бірыңғай нотариаттық цифрлық архив құрылады.
Сонымен қатар, нотариустың жақын туыстары басшы, құрылтайшы немесе акционер болып табылатын заңды тұлғаларға қатысты нотариаттық іс-әрекеттер жасауына шектеу қойылады.
Заңмен Республикалық және аумақтық нотариаттық палаталар төрағаларының, сондай-ақ тәртіптік комиссиялар мүшелерінің өкілеттік мерзімі бір рет қайта сайлану мүмкіндігімен төрт жыл болып белгіленеді.
Бұдан бөлек, мемлекет кепілдік берген заң көмегінің ауқымы кеңейтіліп, енді адвокаттар мен заң консультанттары конституциялық іс жүргізу барысында азаматтардың заңды мүдделерін қорғауға қатыса алады.
