ADYM.KZ / Қазақстанда фильмдерді кинотеатрлар мен жалпы прокатқа шығарар алдында міндетті сараптамадан өткізудің жаңа қағидалары бекітілді. Премьер-министрдің орынбасары-Мәдениет және ақпарат министрі Аида Балаева қол қойған бұл құжат ағымдағы жылдың 12 маусымындаресми түрде күшіне енбек.
Жаңа ережелерге сәйкес, елімізде прокат куәлігін алғысы келетін кез келген фильмнің құқық иеленушілері уәкілетті органға туындының кинопрокатқа арналған толық нұсқасын алдын ала ұсынуға міндетті.
Қазақстанда үлкен экрандарға жол тартпас бұрын әрбір кинотуынды арнайы сараптамадан өтеді. Сарапшылар таспадан дәстүрлі емес сексуалдық бағдарды насихаттау; педофилия мен порнография элементтері, қатыгездік пен зорлық-зомбылыққа табынуды дәріптейтін элементтердің бар-жоғын тексереді: Егер фильм мазмұнынан аталған заң бұзушылықтар анықталса, туындыға Қазақстан аумағында көрсетілімге шығуға рұқсат беретін прокат куәлігі берілмейді.
Еске сала кетейік, биыл Қазақстанда ЛГБТ тақырыбын насихаттауға және бұл бағытты қоғамда оң сипатта көрсетуге ресми түрде тыйым салынған болатын.
Маңызды контекст: Қабылданған заңнамалық түзетулер аясында дәстүрлі емес қарым-қатынас көріністері бар кинотуындыларды елімізде көрсетуге тікелей шектеу қойылды. Бұған дейін де отандық кино саласының мамандары мен қоғам белсенділері тарапынан шетелдік фильмдердегі ашық немесе қайшылықты сахналарды қиып тастау туралы ұсыныстар айтылған болатын. Жаңа ереже осы бағыттағы бақылауды жүйелі түрде жүзеге асыруға мүмкіндік береді.
Мәдениет және ақпарат министрлігі бекіткен бұл қадам еліміздің ішкі ақпараттық және мәдени кеңістігін қорғауға, сондай-ақ заңмен тыйым салынған контенттің үлкен экрандарға шығуына жол бермеуге бағытталған. Сала мамандарының айтуынша, бұл ережелер прокатқа шығатын отандық және шетелдік туындылардың сапасын бақылауды жаңа деңгейге көтереді.
