ADYM.KZ / Астана қаласында «AMANAT» партиясының бастамасымен республикалық «EduAI: Педагогикалық хакатоны» өтті. Бұл шара мұғалімдердің жасанды интеллект (ЖИ) технологияларын білім беру үдерісіне тиімді енгізуге бағытталған озық идеяларын ортаға салатын бірегей алаңы.
Бүгінгі таңда елімізде ұстаздардың заманауи технологияларды меңгеруіне баса назар аударылып отыр. Соның ішінде, «Ustazga AI» ауқымды жобасы аясында айтарлықтай нәтижелерге қол жеткізілді:
400 мыңға жуық педагог еліміз бойынша арнайы оқу курстарынан өтіп, цифрлық сауатын арттырды; 3 500 мұғалім жобаның екінші кезеңіне қатысуға ниет білдірді; 400 үздік жоба іріктеу кезеңдерінен өтіп, хакатонның негізгі бөліміне жолдама алды.
Бұл бастама ұстаздардың заманауи құралдарды сабақ барысында еркін әрі нәтижелі қолдануына жол ашып отыр.
Бас жүлде Оңтүстік Кореяда тағылымдамадан өту
Педагогикалық хакатон тек тәжірибе алмасу ғана емес, сонымен қатар мұғалімдер үшін үлкен мотивациялық шара.
Халықаралық мүмкіндік: Жарыс қорытындысы бойынша ең үздік деп танылған 20 педагог Оңтүстік Кореяға арнайы жолдама алады. Олар технологиясы озық елде халықаралық тәжірибеден өтіп, жасанды интеллектіні білім беру жүйесінде қолданудың әлемдік үлгілерін өз көзімен көріп, меңгеріп қайтпақ.
