ADYM.KZ / Астанада жол жөндеу жұмыстарына байланысты Астана-Қарағанды тасжолының Қобда тұйық көшесінен А-135 көшесіне дейінгі учаскесі бір айға ішінара жабылады. Көлік қозғалысына шектеу 2026 жылғы 9 маусым мен 9 шілде аралығында күшінде болады.
Елордалық Көлік және жол-көлік инфрақұрылымын дамыту басқармасының хабарлауынша, аталған аумақта жол төсеміне орташа жөндеу жұмыстары жүргізіледі. Жөндеу кезең-кезеңімен атқарылатындықтан, автокөлік қозғалысы жолдың бір жағымен екі бағытта бірдей ұйымдастырылады.
Кептелісті айналып өтудің балама бағыттары:
Оңға қарай бағыт: Көлік айрығынан оңға бұрылып, айналма жол арқылы Ақжол көшесіне немесе Алаш тасжолына шығуға болады.
Солға қарай бағыт: Көлік айрығынан солға қарай айналма жолмен Шерхан Мұртаза көшесіне дейін қатынау мүмкіндігі бар.
Қалалық басқарма жүргізушілер мен жаяу жүргіншілерге жолдағы кептелістердің алдын алу үшін жүру бағытын алдын ала жоспарлауды ескертеді. Жол қауіпсіздігін қамтамасыз ету және қолайсыздықты азайту мақсатында жөндеу аумағына уақытша жол белгілері мен арнайы көрсеткіштер орнатылады.
