Бүгін Астана тағы да жаһандық және өңірлік саясаттың бас орталығына айналды. Елордадағы Тәуелсіздік сарайында Қазақстан Президенті Қасым-Жомарт Тоқаевтың төрағалығымен Жоғары Еуразиялық экономикалық кеңестің (ЖЕЭК) кезекті отырысы өтті, деп хабарлайды Adym.kz ақпараттық сайты Ақордаға сілтеме жасап.Бүгінгі жиын осыдан 12 жыл бұрын (2014 жылғы 29 мамырда) ұйымның негізін қалаған Шартқа қол қойылған тарихи күнмен тұспа-тұс келді. Одаққа мүше елдердің басшылары Астана төрінде бас қосып, алдағы бес жылдыққа арналған стратегиялық межелерді айқындады.
Астанаға кімдер келді?
Жоғары деңгейдегі саммитке Қазақстан Президентімен қатар, Ресей басшысы Владимир Путин, Беларусь Президенті Александр Лукашенко және Қырғызстан жетекшісі Садыр Жапаров қатысты. Ал Армения атынан Премьер-министрдің орынбасары Мгер Григорян өкілдік етті.
Жиынның маңызын арттыра түскен тағы бір жайт одақтан тыс көршілес елдердің де бұл басқосуға деген жоғары қызығушылығы болды. Мәселен, Өзбекстан Президенті Шавкат Мирзиёев пен Кубаның вице-президенті Сальвадор Вальдес Меса саммитке байқаушы мемлекет ретінде арнайы қосылды.
Басты тренд-Жасанды интеллект және 100 миллиард долларлық меже
Биылғы Астана саммитінің басты жаңалығы мен ерекшелігі оның V Еуразиялық экономикалық форуммен ұштасуында болды. Бұл жолғы форумның негізгі тақырыбы заманауи трендке сай «ЕАЭО жаһандық цифрлық бәсекеде: жасанды интеллектке басымдық» деп аталды.
Мемлекет басшылары тек сауда-саттықты ғана емес, заманауи технологиялар бәйгесінде артта қалмау мәселесін пысықтады.
Жиын қорытындысы бойынша Жасанды интеллектіні жауапкершілікпен дамыту жөніндегі бірлескен мәлімдеме қабылданды. Бұл ендігі кезекте одаққа мүше елдер экономиканың барлық саласына нейрожелілер мен озық ІТ-платформаларды бірлесе енгізеді деген сөз.
Президент Қасым-Жомарт Тоқаев өз сөзінде ЕАЭО-ның экономикалық қуаты жыл санап артып келе жатқанын айтты. Төрағаның мәліметінше, биыл ұйым ішіндегі өзара тауар айналымы тарихи көрсеткішке жетіп, 100 миллиард АҚШ долларынан асуы мүмкін.
Келісімдер бизнес пен қарапайым халыққа пайдалы болмақ
Кездесу соңында президенттер маңызды құжаттар топтамасына қол қойды. Ондағы негізгі шешімдер келесідей бағыттарды қамтиды: Тауар тасымалындағы артық кедергілерді жою; Елдер арасындағы көлік дәліздерін дамытып, тауар жеткізу уақытын қысқарту; 20 жылдық тарихы бар Еуразиялық даму банкі (ЕДБ) арқылы жаңа өндіріс орындары мен ірі инфрақұрылымдық жобаларды қаржыландыру.
Астанада қабылданған бұл шешімдер алдағы жылдары отандық бизнеске жаңа нарықтар ашуға, ал қарапайым тұтынушылар үшін тауарлар мен қызметтердің қолжетімді әрі сапалы болуына жол ашпақ.
Елорда саммиті ЕАЭО-ның тек қағаз жүзіндегі емес, нақты цифрлық әрі заманауи бағыттағы интеграцияға көшкенін дәлелдеді.
