ADYM.KZ / Қазақстан Ұлттық банкінің реттеушілік «құмсалғышында» қазіргі таңда 33-тен астам инновациялық жоба тестілеуден өтіп жатыр. Сәтті шыққан стартаптар болашақта толыққанды лицензия алып, ресми нарыққа шығуды көздейді.Бұл туралы «Қазақстан Республикасындағы криптоиндустрияны дамыту және оны реттеу ерекшеліктері» атты жабық дөңгелек үстел жиынында Ұлттық банктің жауапты маманы Мадияр Қызайбеков мәлімдеді.
Ұлттық банктің Инновациялар және цифрлық активтер басқармасының бас маманы М. Қызайбековтің айтуынша, арнайы алаң жаңа қаржы өнімдерін заңнамалық өзгерістер енгізілгенге дейін қауіпсіз сынақтан өткізуге мүмкіндік береді:
«„Құмсалғыш“ қатысушылары өз бизнес-модельдерінің қаншалықты өміршең әрі тұрақты екенін түсінеді. Тестілеуден кейін олардың көбі толыққанды лицензия алуға ұмтылады»,- деді спикер.
Сынақтан криптотөлемдер жүйесі мен стейблкоин шығару, жылжымайтын мүлік пен бағалы металдарды цифрлық форматқа көшіру, криптоброкерлік және кастодиандық қызметтер, сондай-ақ жаңа цифрлық платформалар өтуде.
Жобаның тағы бір ерекшелігі бұл үдеріске тек финтех-компаниялар ғана емес, еліміздің дәстүрлі қаржы институттары да белсенді араласуда. Бүгінде жоба аясында екінші деңгейлі 10-нан астам отандық банк, ірі цифрлық платформалар мен халықаралық компаниялар серіктес ретінде жұмыс істеп жатыр.
Ұлттық банк сарапшылары бұл қадам ел экономикасына жаңа инвестиция тартып, заманауи қаржы құралдарының дамуына үлкен серпін береді деп есептейді.
