Мемлекет басшысы Қасым-Жомарт Тоқаев Мемлекеттік рәміздер күніне орай елордадағы «Атамекен» этномемориалды кешенінде өткен Мемлекеттік ту көтеру салтанатты рәсіміне қатысты, деп хабарлайды Adym.kz ақпараттық сайты Ақордаға сілтеме жасап.
Шара барысында Құрмет қарауылының бастығы салтанатты іс-шараға дайындығы туралы Президентке рапорт берді. Осыдан кейін еліміздің мемлекеттік әнұраны шырқалып, көк байрағымыз көкке көтерілді.
Салтанатты жиында сөз сөйлеген Мемлекет басшысы барша қазақстандықтарды айтулы мерекемен құттықтап, ұлттық нышандардың мемлекеттігіміз үшін орны бөлек екенін қадап айтты:
«Баршаңызды Мемлекеттік рәміздер күнімен шын жүректен құттықтаймын! … Қастерлі рәміздеріміз ұлт құндылықтарының жарқын символы. Елтаңба елдігіміздің айшықты белгісі, Әнұран азаттығымыздың айбынды үні, ал Көк Туымыз Тәуелсіздік тұмары. Төбемізге көтеріп, қадір тұтатын осы үш рәмізді мемлекеттігіміздің мызғымас үштағаны десек, артық болмайды»,- деді Мемлекет басшысы.
Президент рәміздерді қастерлеу отаншылдық рухтың биік өлшемі және ел тұтастығының кепілі екенін атап өтті. Сондай-ақ, жақын арада Үкімет мемлекеттік рәміздерді орынды пайдалану мәселесі бойынша қаулыға тиісті түзетулер енгізіп, олардың мәртебесін арттыру бағытындағы жұмыстарды жалғастыратынын жеткізді.
