ADYM.KZ / Астана қаласында 1-9 маусым аралығында боччадан тұңғыш рет «Astana 2026 World Boccia Cup» халықаралық турнирі өтіп жатыр. Әлем кубогінің осы рейтингтік кезеңіне дүниежүзінің 24 елінен 90-ға жуық спортшы жиналды.Дүбірлі жарыстың ресми ашылу салтанатына Бочча федерациясының президенті Мәулен Әшімбаев, Халықаралық бочча федерациясының басшысы Джонатан Морган және Туризм және спорт министрі Ербол Мырзабосынов қатысты.
Жарыстар жекелей, жұптық және командалық есепте ұйымдастырылуда. Айтулы додада ел намысын 10 спортшы қорғауда. Бақ сынаушылар арасында қозғалыс мүмкіндігі шектеулі BC3 санатындағы спортшылар да бар.
Жауапты дода қарсаңында ұлттық құраманың деңгейін көтеру үшін Португалиядан белгілі бапкер Роберто Матеуш шақырылды.
Ол отандық спортшылардың техникалық және тактикалық дайындығын жетілдіруге атсалысып жатыр.
Турнир аясында ҚР Парламенті Сенатының Төрағасы Мәулен Әшімбаев пен Джонатан Морган екіжақты кездесу өткізді.
Тараптар Қазақстанда боччаны дамыту мен паралимпиадалық спортты қолдау мәселелерін талқылады. Халықаралық федерация басшысы еліміздің инклюзивті спортты ілгерілету бағытындағы жұмысына жоғары баға берді.
