ADYM.KZ / Шымкент қаласы жастар саясаты басқармасының «Жастар ресурстық орталығы» КММ-нің ұйымдастыруымен жастарға кәсіби бағдар беру және өндіріс саласының ерекшеліктерін таныстыру мақсатында «ҚазМедПром» жауапкершілігі шектеулі серіктестігіне экскурсия ұйымдастырылды.
Танымдық сапар барысында қатысушылар кәсіпорынның жұмысымен, өндірістік процестерімен және медициналық бұйымдарды шығару технологиясымен танысты. Жастар медициналық қолғаптарды өндірудің негізгі кезеңдерін көріп, заманауи автоматтандырылған желілердің жұмысын бақылауға мүмкіндік алды. Мамандар өндірістегі технологиялық процестер мен өнім сапасын қамтамасыз етудің маңызы туралы ақпарат берді.
Экскурсия кезінде кәсіпорынның қалыптасу тарихы, даму кезеңдері және өндірістік қызметінің негізгі бағыттары таныстырылды. Сонымен қатар қатысушыларға Panagloves сауда маркасымен шығарылатын медициналық қолғаптар туралы мәлімет берілді. Күнделікті медицина саласында қолданылатын мұндай бұйымдарды өндіруде сапа талаптарын сақтау мен өндірістік процестердің жүйелі ұйымдастырылуының маңызы түсіндірілді.
Кәсіпорын қызметінің халықаралық ISO 13485 сапа менеджменті стандартына сәйкес жүргізілетіні де атап өтілді. Бұл стандарт медициналық бұйымдарды өндіру саласындағы сапа менеджменті жүйесіне қойылатын талаптарды қамтиды. Осы арқылы жастар өндірісте сапаны бақылау, технологиялық тәртіпті сақтау және өнімге қойылатын талаптарды орындау мәселелері жөнінде түсінік алды.
Кездесу барысында өндіріс саласындағы мамандықтар мен кәсіби дағдылардың маңызына да назар аударылды. Заманауи кәсіпорындардың жұмысы технологиялық білімді, жауапкершілікті, ұқыптылықты және үнемі дамуға дайын болуды талап етеді. Мұндай тәжірибелік танысу жастарға өндірістік орта туралы нақты түсінік қалыптастырып, болашақ мамандығын таңдауда бағыт-бағдар береді.
«Жастар ресурстық орталығы» ұйымдастыратын осындай экскурсиялар жас буынның өндіріс саласына қызығушылығын арттыруға, еңбек нарығындағы мүмкіндіктерді таныстыруға және кәсіби таңдау жасауына қолдау көрсетуге бағытталған.
