ADYM.KZ / Испания астанасы Мадрид қаласында қазақстандық әнші Димаш Құдайбергеннің шығармашылығы мен оның испандық жанкүйерлеріне арналған «Al Compás de Su Voz» деректі фильмінің ресми тұсаукесері өтті. Жобаны әртістің Испаниядағы фан-клубы мен «La Gran Voz Kazaja» қауымдастығы бірлесіп әзірлеген. Туындының режиссері жас испан кинематографисі Давид Кольянтес Родригес.
Мәдени іс-шара Palacio de Hielo кинотеатрында ұйымдастырылып, 130-дан астам көрерменнің басын қосты. Премьераға Қазақстанның Испаниядағы Төтенше және Өкілетті Елшісі Данат Мұсаев бастаған дипломаттар, қазақ диаспорасы мен қоғамдық ұйым өкілдері қатысты.
Бұл Испанияда тек әртістің өзіне ғана емес, оның халықаралық жанкүйерлер қауымдастығы «Dears» феноменіне арналған алғашқы киножоба. Картина фан-қоғамдастықтың 5 мүшесінің шынайы оқиғасына негізделген. Олар Димаш өнерімен қалай танысқанын және фандомның өз өмірлеріне тигізген әсерін баяндайды.
Фильмнің финалдық титрлары Барселонада Димашпен бір сахнада өнер көрсеткен 15 жастағы қазақстандық әнші Жанель Әлидің орындауындағы «Te prometo» әнімен сүйемелденеді. Режиссер Испанияның бірнеше өңірін аралап, кейіпкерлермен кездесу арқылы «Димаш қозғалысының» мәдени және эмоциялық ықпалын зерттеген.
Жоба авторларының мәліметінше, жақын арада деректі фильм Испанияның бірнеше ұлттық кинофестиваліне ұсынылады. Фестивальдік прокат аяқталған соң, туынды ашық онлайн-платформаларға жүктеледі. Халықаралық аудитория үшін фильмге ағылшын, қазақ, орыс және қытай тілдерінде субтитрлер дайындау жоспарланған.
