ALMATY — ADYM.KZ / Қазақстанның туристік әлеуеті жаһандық цифрлық кеңістікте жаңа серпін алды. Осы аптада Алматы қаласына миллиондаған жазылушысы бар әлемге танымал танымал креаторлар Джо Хаттаб (Joe Hattab) пен Джошуа Платильеро (Joshua PlatiIiero) арнайы шығармашылық сапармен келді.
Отандық танымал блогер Дастан Мұхамедрахымның ұйытқы болуымен және ресми ведомстволардың қолдауымен өткен бұл турдың басты мақсаты көшпенділер мәдениеті мен Жетісу өңірінің табиғи інжу-маржандарын әлемдік деңгейде дәріптеу.
Бұл сапардың Қазақстан үшін медиалық салмағы өте жоғары, себебі блогерлердің контенті халықаралық деңгейде тренд қалыптастыра алады. Джо Хаттаб ютуб және әлеуметтік желілердегі жалпы аудиториясы 10 миллионнан асатын, деректі фильм форматындағы сапалы видеоларымен танымал араб әлемінің ең ықпалды тревел-диджитал креаторларының бірі. Оның сюжеттері мәдениеттердің тереңдігін ашуға бағытталған. Ал, Джошуа Платильеро әлемнің ең экзотикалық нүктелерінен кинематографиялық стильде визуалды эстетикасы жоғары контент жасайтын танымал инфлюенсер.
Ұйымдастырушылар шетелдік қонақтар үшін Орталық Азияның қонақжайлылығы мен қазақ мәдениетінің байлығын толық сезіндіретін ерекше бағдарлама әзірлеген.
Түсірілім тобы Алматының маңындағы ең көрікті жерлерді аралады.
Шетелдік блогерлер қазақ үйдің құрылымымен танысып, ұлттық тағамдардан дәм татты. Олар әсіресе қазақтың қонақжайлылық дәстүрі мен ет асу, қымыз сапыру мәдениетіне ерекше тәнті болды.
Кинематографиялық кадрлар түсіру үшін топ Шарын шатқалы мен Көлсай, Қайыңды көлдеріне жол тартты. Олар Қазақстан табиғатының контрастына бір жағы шағын каньондар, екінші жағы мәңгілік мұздықтар мен жайқалған қылқан жапырақты ормандардың көршілес орналасуына таңғалыстарын жасырмады.
Қыран құс баптаған бүркітшілермен кездесу және ат үстіндегі көкпар, аударыспақ секілді ұлттық ойындар Джо Хаттабтың болашақ деректі видеосының негізгі өзегіне айналды
«Kazakh Tourism» ұлттық компаниясының өкілдері атап өткендей, мұндай халықаралық инфлюенсерлерді тарту дәстүрлі жарнамаға қарағанда әлдеқайда тиімді әрі тікелей нәтиже беретін заманауи маркетингтік құрал.
Редакция түйіні: Джо Хаттаб пен Джошуа сияқты алпауыт креаторлардың парақшаларында Қазақстан туралы видеолардың жарық көруі Таяу Шығыс, Еуропа және Америкадан келетін туристер ағынын еселеуге тікелей ықпал етпек.
Алматы тек демалыс орны ғана емес, әлемдік деңгейдегі контент өндіруге сұранып тұрған креативті индустрияның орталығы екенін тағы бір мәрте дәлелдеді.
Жақын күндері блогерлердің миллиондаған қаралым жинайтын Алматы сапары туралы ауқымды туындылары әлеуметтік желілерде жарияланбақ.
Жаңалықты Adym.kz порталымен бірге бақылаңыздар.
