Мемлекет басшысы Қасым-Жомарт Тоқаевтың Алматы облысына жұмыс сапары Алатау қаласының бас жоспарымен танысудан басталды, деп хабарлайды Adym.kz ақпараттық сайты Ақордаға сілтеме жасап.
Бүгінде шаһардың жалпы аумағы 88 мың гектарды құрап отыр. Жаңа жоспар бойынша қала 2050 жылға дейін кезең-кезеңімен дамитын 4 арнаулы аумаққа бөлінген. Осыған байланысты шаһарда магистралды желілерді ілгерілетудің арнайы жол картасы әзірленіп, басқарудың мүлдем жаңа моделін енгізетін Конституциялық заң қабылданды.
Қазіргі уақытта қала құрамындағы Gate City тұрғын үй алабы жедел өркендеп келеді. Мұнда заманауи «жайлы мектеп» салынып, «Маревен Фуд», «КНАУФ», Fruit Art, Dolce Pharm және Алматы желдеткіш зауыттары сияқты ірі кәсіпорындар сәтті жұмыс істеп тұр.
Мұнымен қоса, Алатауда жалпы құны 2 триллион теңгеден асатын 53 инвестициялық жоба жасақталды. Олардың қатарында PepsiCo компаниясының Орталық Азиядағы ең ірі картоп өңдеу зауыты және Mars Petcare-дің үй жануарларына азық шығаратын аймақтағы алғашқы бірегей жобасы бар. Сондай-ақ KHAN TENGRI BIOPHARMA компаниясы фармацевтикалық өнімдер мен медициналық қондырғылар өндірісін қолға алса, «Исткомтранс» пен G-Trans кәсіпорындары қуатты логистикалық кластер құру үстінде.
Сапар соңында Президентке қаланың негізгі нысанына айналатын Gate District ауданындағы көпфункционалды озық Iconic Complex жобасы да ресми түрде таныстырылды.
