МӘДЕНИЕТ. ADYM.KZ / Әлемге әйгілі Cirque du Soleil ұжымы Қазақстанға табан тіреді. Халықаралық цирк труппасы Астана мен Алматы қалаларында өздерінің ең танымал әрі аңызға айналған «OVO» шоуын көрермен назарына ұсынбақ. Түрлі түсті жәндіктер әлемін сипаттайтын ерекше қойылым елімізде жалпы саны 14 рет сахналанады.Ұйымдастырушылардың мәліметінше, ауқымды әлемдік тур аясында өтетін бұл өнер кешін 70 мыңнан астам қазақстандық тамашалайды деп күтілуде. Гастрольдік сапардың кестесі төмендегідей:
- Астана қаласы: 4–7 маусым аралығында «Barys Arena» сахнасында;
- Алматы қаласы: 11–14 маусым күндері «Almaty Arena» төрінде (алғаш рет).
Бұл – Cirque du Soleil ұжымының 42 жылдық тарихында Қазақстанға екінші мәрте келуі. Олар елімізде алғаш рет «EXPO-2017» халықаралық көрмесі аясында өнер көрсеткен болатын. Қойылымды ұйымдастыруға әлемнің 25 елінен жиналған 100-ден астам жоғары деңгейлі маман атсалысуда. Трупа құрамында Бразилия, Канада, Франция, Қытай, Моңғолия және Ресей елдерінің халықаралық әртістері бар.
Шоудың ауқымы мен техникалық күрделілігі соншалық, цирк ұжымы елімізге жалпы салмағы 200 тонна болатын жабдықты екі бірдей жүк ұшағымен жеткізген. Олардың ішінде алып декорациялар, дыбыс пен жарық жүйелері және жүздеген арнайы костюмдер бар.
«OVO» шоуының PR-менеджері Жани Малле елорда тұрғындарының қонақжайлылығына тәнті болғанын жасырмады:
«Қазақстанға келгенімізге өте қуаныштымыз. Ұлттық оркестрдің өнерін тамашалап, жергілікті тағамдардан, әсіресе бауырсақтан дәм таттық. Адамдар өте жылы жүзді екен. Қаланы аралап, мәдениетпен таныстық. Енді қазақстандық көрермендермен кездесуді асыға күтеміз», – деді ол.
