ADYM.KZ / Әзербайжанда Орталық Азия мен Таяу Шығыс елдеріне қызмет көрсететін жасанды интеллект саласындағы өңірлік озық тәжірибе орталығы құрылады. Бұл жоба елдің цифрлық технологиялар саласындағы халықаралық ынтымақтастығын кеңейтуге бағытталған.
Тиісті меморандумға Әзербайжанның Инновациялар және цифрлық даму агенттігі (İRİA) мен халықаралық Polygraf AI стартапы қол қойды.
Келісім аясында Баку қаласында жасанды интеллект шешімдерін әзірлеу және енгізу платформасы іске қосылып, технология, инженерия және киберқауіпсіздік бағыттарында жергілікті мамандардан құралған кәсіби команда жасақталады.
Жоба аясында жасанды интеллект, машиналық оқыту, деректерді қорғау және киберқауіпсіздік салаларында кадр даярлауға басымдық беріледі. Осы мақсатта технопарктер мен жоғары оқу орындарының қатысуымен білім беру бағдарламалары, тағылымдамалар және тәжірибе алмасу жобалары ұйымдастырылады.
Бұдан бөлек, тараптар жасанды интеллект қауіпсіздігі, дербес деректерді қорғау, жалған және синтетикалық контентті анықтау бағытында бірлескен зерттеулер мен технологиялық шешімдерді жүзеге асырады. Сондай-ақ Әзербайжанда мемлекеттік және жеке секторға арналған пилоттық жобалар іске қосылады.
Бастама Әзербайжанның 2025–2028 жылдарға арналған жасанды интеллект стратегиясы мен 2026–2028 жылдарға арналған цифрлық дамуды жеделдету жөніндегі іс-қимыл жоспары аясында жүзеге асырылады.
Сонымен қатар, серіктестер әзербайжандық цифрлық өнімдерді халықаралық нарыққа, оның ішінде Африка елдеріне шығаруды көздеп отыр.
