ADYM.KZ / Түркістан облысында жалпы құны 172 млрд теңгені құрайтын халықаралық тау шаңғысы кластерін салу жоспарланып отыр. Бұл туралы «Сайрам-Өгем» мемлекеттік ұлттық табиғи паркінде өткен көшпелі кеңесте мәлім болды.
Кеңеске ҚР Премьер-министрінің бірінші орынбасары Нұрлыбек Нәлібаев қатысып, өңірде экотуризмді дамытуға бағытталған инвестициялық жобаларды талқылады. Іс-шараға 50-ден астам отандық және шетелдік инвестор қатысты.
Жиында Біркөлік, Қасқасу және Сайрамсу шатқалдарында туристік инфрақұрылым құру, демалыс аймақтары мен туристік-рекреациялық кешендер салу жобалары таныстырылды. Сондай-ақ Төлеби және Түлкібас аудандарында халықаралық стандарттарға сай апарт-кешендер мен бутик-қонақүйлер салу жоспарлары ұсынылды.
Кеңесте KASKASU халықаралық тау шаңғысы кластерінің тұжырымдамасы да таныстырылды. Жоба China Construction Sixth Engineering Bureau Corp. LTD компаниясымен бірлесіп жүзеге асырылмақ. Жоспар бойынша туристік ауылдар, қонақүйлер, спорттық және ойын-сауық нысандары, заманауи аспалы жолдар салынып, курорттың жыл бойы жұмыс істеуіне жағдай жасалады.
Үкімет өкілдерінің айтуынша, жоба Түркістан облысын Орталық Азиядағы жетекші тау туризмі орталықтарының біріне айналдыруға бағытталған.
Нұрлыбек Нәлібаев инвестициялық жобаларды іске асыру кезінде экологиялық талаптарды сақтау, құрылыс сапасын қамтамасыз ету және белгіленген мерзімдерді қатаң орындау маңызды екенін атап өтті. Оның сөзінше, инвесторлар өз міндеттемелерін орындамаған жағдайда жер учаскелері мемлекетке қайтарылады.
Жұмыс сапары барысында бірінші вице-премьер «Сайрам-Өгем» ұлттық паркінің аумағын әуеден шолып, өңірдің туристік және табиғи әлеуетімен танысты. Кеңес қорытындысында жауапты органдар мен инвесторларға жобаларды жедел іске асыру және ұлттық парктің халықаралық туристік тартымдылығын арттыру бойынша нақты тапсырмалар берілді.
