ADYM.KZ / Шымкент қалалық ардагерлер ұйымының ұйымдастыруымен «Ұлттық құндылықтар аясындағы рухани тәрбие – ұрпақтар сабақтастығының негізі» тақырыбында форум өтті. Маңызды жиынның басты мақсаты – ұлттық құндылықтарды дәріптеу, қоғамдағы рухани тәрбиенің рөлін арттыру, сондай-ақ аға буын мен жас ұрпақ арасындағы байланысты нығайту.
Форумға «Ардагерлер ұйымы» республикалық қоғамдық бірлестігі орталық кеңесінің төрағасы Әбілғазы Қалиақпарұлы Құсайынов, қалалық ардагерлер ұйымының төрағасы Кенжехан Атақұлұлы Төлебаев, зиялы қауым өкілдері, білім беру ұйымдарының басшылары, жастар және дін саласының өкілдері қатысты.
Жиын барысында ұлттық тәрбие, тарихи сана, дәстүрлі дін мен ұлттық бірегейлік, отбасы құндылықтары, жастардың азаматтық жауапкершілігі секілді өзекті мәселелер кеңінен талқыланды. Қатысушылар ұлттың рухани негізін сақтауда тарихи мұра мен дәстүрдің, отбасы тәрбиесі мен қоғамдық ортаның маңызына назар аударды.
Қазақстанның еңбек сіңірген қоғам және заң қайраткері Бекет Тұрғараұлы Тұрғараев «Алтын Орда – тарихи сана мен бабалар аманаты» тақырыбында баяндама жасап, тарихи мұраны зерделеу мен оны келер ұрпаққа жеткізудің маңызын атап өтті. Ал Шымкент қаласының бас имамы Бақдәулет Абдрахманов дәстүрлі дін мен ұлттық бірегейліктің өзара сабақтастығына тоқталды.
Сонымен қатар «Жанұя жарасымы» отбасыларға кеңес беру орталығының басшысы Асылбек Әуезханұлы Ноғаев отбасы институтын нығайту, ұлттық тәрбие мен отбасылық құндылықтарды дәріптеу мәселелерін көтерді. Қалалық ардагерлер кеңесінің пленум мүшесі Әбила Көздібайқызы Көздібаева жастар тәрбиесі мен жасампаз патриотизмнің маңызына тоқталды. Қалалық Жастар ресурстық орталығының басшысы Жансерік Бауыржанұлы Жұман үлкенге құрмет көрсету, салауатты өмір салтын қалыптастыру және жастардың қоғамдық белсенділігін арттыру жөнінде пікір білдірді.
Форумда көтерілген мәселелер аға буынның өмірлік тәжірибесін жас ұрпақ тәрбиесінде тиімді пайдалану, ұлттық сананы қалыптастыру және қоғамдағы өзара құрмет пен жауапкершілікті нығайту қажеттігін көрсетті.
Жиынды қорытындылаған қала әкімінің орынбасары Сәрсен Абайұлы Құранбек рухани тәрбие мен ұлттық құндылықтарды сақтау ісіне қоғам болып атсалысудың маңызын атап өтті. Сондай-ақ форум шешімі мен қала тұрғындарына арналған үндеу жобасын қабылдау мәселесі қаралды.
Форум қорытындысы бойынша ұлттық құндылықтарды сақтау, ұрпақ тәрбиесіне ортақ жауапкершілікпен қарау және қоғамдағы рухани сабақтастықты нығайту жөніндегі ұсыныстар талқыланды.
Толығырақ: https://www.youtube.com/live/JbNhVEuPNG0?si=-fv8FDkFsWwTm9y5
