ADYM.KZ / Шымкент қаласында жастардың кәсіби бағдарын қалыптастыруға және еңбек нарығына бейімделуіне бағытталған танымдық экскурсия ұйымдастырылды. Шараны Шымкент қаласы Жастар саясаты басқармасының «Жастар ресурстық орталығы» КММ ұйымдастырды.
Экскурсияға жоғары оқу орындарының бітіруші түлектері мен NEET санатындағы жастар қатысып, «Пром Парк» газ қазандықтарын өндіру кәсіпорнының жұмысымен танысты.
Іс-шараның мақсаты – жастарға өндіріс саласының ерекшеліктерін таныстыру, теориялық білімді тәжірибемен ұштастыруға мүмкіндік беру және болашақ мамандықты таңдауда бағыт-бағдар көрсету. Сонымен қатар жастардың жұмысшы мамандықтарына деген қызығушылығын арттырып, еңбек нарығындағы сұранысқа ие кәсіптер туралы түсінігін кеңейту көзделді.
Кәсіпорынға экскурсия барысында қатысушылар газ қазандықтарын өндіру технологиясымен, заманауи жабдықтармен және өндірістік үдерістердің ұйымдастырылуымен танысты. Мамандар өндірістің негізгі кезеңдері, өнімнің дайындалу ерекшеліктері және технологиялық талаптар туралы ақпарат берді.
Кездесу кезінде жастар өндіріс саласындағы мамандықтар, қажетті кәсіби дағдылар және жұмысқа орналасу мүмкіндіктері туралы мәлімет алды. Сондай-ақ өздерін қызықтырған сұрақтарын қойып, сала мамандарынан жауап алды. Мұндай тікелей таныстық жастарға кәсіпорынның күнделікті жұмысын көзбен көріп, өндірістегі еңбек ерекшеліктерін жақынырақ түсінуге мүмкіндік береді.
Кәсіби бағдар – болашаққа бастар қадам. Өндіріс орындарына экскурсия ұйымдастыру жастардың мамандықтар әлемі туралы білімін толықтырып қана қоймай, өз қабілеті мен қызығушылығына сай кәсіби жолды анықтауына ықпал етеді. Әсіресе жоғары оқу орнын аяқтауға жақын түлектер мен NEET санатындағы жастар үшін еңбек нарығымен танысу, жұмыс берушілердің талаптарын түсіну және жаңа мүмкіндіктерді қарастыру маңызды.
Осындай бастамалар жастар мен жұмыс берушілер арасындағы байланысты нығайтуға, кәсіби бағдар беру жұмысын жандандыруға және жастардың жұмыспен қамтылуына ықпал етеді. Өндіріс орындарының тыныс-тіршілігімен танысу арқылы жастар өз болашағын жоспарлап, еңбекке деген ынтасын арттыруға мүмкіндік алады.
