ADYM.KZ / Вакцинация – жұқпалы аурулардың алдын алуға, олардың ауыр өтуі мен асқыну қаупін төмендетуге бағытталған маңызды профилактикалық шара. Жоспарлы иммундау халықтың инфекцияларға қарсы қорғанысын қалыптастырып, аурулардың таралуын шектеуге және қоғамдық денсаулықты сақтауға мүмкіндік береді.
Қазақстанда Ұлттық профилактикалық екпелер күнтізбесіне сәйкес бірқатар жұқпалы ауруларға қарсы жоспарлы вакцинация жүргізіледі. Олардың қатарында туберкулез, В вирустық гепатиті, полиомиелит, көкжөтел, дифтерия, сіреспе, гемофильді және пневмококк инфекциялары, қызылша, қызамық, паротит және адам папилломасы вирусына (АПВ) қарсы екпелер бар. Бұдан бөлек, эпидемиологиялық жағдайға байланысты арнайы көрсетілімдер бойынша да вакцинация жасалады.
Вакцинамен басқарылатын инфекциялардың алдын алуда екпенің маңызы ерекше. Мәселен, В вирустық гепатиті – бауырды зақымдайтын жұқпалы ауру. Ол қан арқылы және инфекция жұқтырған адамның кейбір биологиялық сұйықтықтары арқылы берілуі мүмкін. Ауру созылмалы түрге ауысып, бауыр циррозы мен қатерлі ісік сияқты ауыр асқынуларға әкелуі ықтимал. Сондықтан вакцинация осы инфекциядан қорғанудың тиімді жолдарының бірі саналады.
Сондай-ақ қызылша, көкжөтел, дифтерия, полиомиелит секілді аурулар адам денсаулығына елеулі қауіп төндіреді. Әсіресе балалар мен иммунитеті әлсіз адамдар үшін олардың салдары ауыр болуы мүмкін. Осыған байланысты профилактикалық екпелерді белгіленген мерзімде алу және иммундау күнтізбесін сақтау маңызды.
Вакцинация медициналық тексеруден кейін, белгіленген тәртіпке сәйкес және адамның денсаулық жағдайы ескеріле отырып жүргізіледі. Екпе алдында медицина қызметкері қажетті ақпарат беріп, ықтимал қарсы көрсетілімдерді анықтайды. Вакцинадан кейінгі жағдайды бақылау да медициналық қауіпсіздіктің маңызды бөлігі болып табылады.
Мамандар профилактикалық екпелерден негізсіз бас тартпауға және вакцинация мәселелері бойынша тек ресми медициналық ақпарат көздеріне жүгінуге кеңес береді. Өйткені иммундау жеке адамның денсаулығын қорғаумен қатар, қоғамда ұжымдық иммунитеттің қалыптасуына және инфекциялық аурулардың таралу қаупін азайтуға ықпал етеді.
Уақытылы вакцинация жасау – өз денсаулығыңды және айналаңдағы адамдардың қауіпсіздігін қорғауға бағытталған жауапты қадам.
