ADYM.KZ / Қазақстан мен Қытай стратегиялық әріптестікті одан әрі нығайтып, сауда, инвестиция және көлік-логистика салаларындағы ынтымақтастықты кеңейтуді көздеп отыр.
Бұл мәселелер IX «Қытай-Еуразия» халықаралық көрмесі аясында Қазақстан Премьер-министрінің орынбасары – Ұлттық экономика министрі Серік Жұманғарин мен ҚХР Мемлекеттік кеңесі Премьер-министрінің орынбасары Дин Сюэсянның кездесуінде талқыланды.
Келіссөз барысында тараптар екі ел арасындағы сауда көлемі тұрақты өсіп келе жатқанын атап өтті. 2025 жылы өзара тауар айналымы рекордтық 48,7 млрд долларға жетсе, 2026 жылдың алғашқы бес айында бұл көрсеткіш 22 млрд долларды құрап, өткен жылдың сәйкес кезеңімен салыстырғанда 27 пайызға артқан. Жыл соңына қарай сауда көлемі 50 млрд доллардан асуы мүмкін.
Серік Жұманғариннің айтуынша, екі елдің мақсаты – алдағы жылдары өзара тауар айналымын 100 млрд долларға жеткізу. Осыған байланысты Қазақстан мен Қытайдың 2027-2030 жылдарға арналған сауда-экономикалық ынтымақтастық бағдарламасын жедел келісу ұсынылды.
Кездесуде инвестициялық әріптестік мәселесіне де ерекше назар аударылды. Тәуелсіздік жылдарында Қытай Қазақстан экономикасына шамамен 30 млрд доллар көлемінде тікелей инвестиция құйған. Қазақстан тарапы қытайлық инвесторларды ауыл шаруашылығы өнімдерін терең өңдеу, металлургия, агрохимия және пилотсыз ұшу аппараттарын өндіру салаларындағы жобаларға қатысуға шақырды.
Тараптар көлік-логистика саласындағы ынтымақтастықты да талқылады. Бүгінде Қытайдан Еуропаға құрлық арқылы тасымалданатын жүктің шамамен 85 пайызы Қазақстан аумағы арқылы өтеді. Осыған байланысты еліміз шекаралық инфрақұрылымды кеңейтіп, өткізу қабілетін арттыру жұмыстарын жүргізіп жатыр.
Атап айтқанда, «Бақты–Аягөз» бағытындағы үшінші теміржол өткелін қоса алғанда, үш негізгі өткелдің жылдық өткізу қуаты 100 млн тонна жүкке дейін жетеді. Қытай тарапы Қазақстанмен шекарадағы үшінші теміржол өткелін бірлесіп салуға дайын екенін білдірді.
Кездесу қорытындысында тараптар сауда мен инвестиция көлемін арттыруға, көлік дәліздерін дамытуға және цифрлық экономика, жасанды интеллект, энергетика салаларындағы ынтымақтастықты тереңдетуге ниетті екенін растады.
