ADYM.KZ / Шымкент қаласы жастар саясаты басқармасының «Жастар ресурстық орталығы» КММ-нің ұйымдастыруымен Тамақтандыру индустриясы және сервис колледжінің студенттері арасында «Ғаламтор діни ұстаз емес» тақырыбында ақпараттық-түсіндіру кездесуі өтті.
Іс-шараның мақсаты – жастардың діни сауаттылығын арттыру, интернеттегі діни мазмұндағы ақпаратты дұрыс бағалауға үйрету, жат діни ағымдардың ықпалынан сақтандыру және зайырлы қоғам құндылықтарын құрметтеуге үндесу.
Кездесуге Жастар ресурстық орталығының Аутрич және NEET жастармен жұмыс бөлімінің маманы Қармантай Нұржақсын, «Қоғамдық келісім» КММ-нің сарапшысы Нұржан Абдукаримов және «Дін мәселелерін зерттеу орталығы» КММ-нің бөлім басшысы Рауан Қыпшақбаев қатысты.
Интернеттегі діни ақпаратты саралай білу маңызды. Кездесу барысында мамандар әлеуметтік желілер мен түрлі интернет-платформаларда жарияланатын діни ақпараттың бәрі бірдей сенімді дереккөзге сүйене бермейтінін түсіндірді. Студенттерге ақпарат авторын, оның дереккөзін және мазмұнын тексеру, күмәнді жарияланымдарға сын көзбен қарау, діни мәселелер бойынша білікті мамандар мен ресми ақпарат көздеріне жүгіну қажеттігі айтылды.
Жат діни ағымдардың ықпалынан сақтану жолдары талқыланды. Мамандар жастарға жалған діни түсініктер мен күмәнді уағыздардың ықпалына түспеу, кез келген ақпаратты жан-жақты зерделеу және шешім қабылдауда жауапкершілік таныту жөнінде түсінік берді. Сонымен қатар діни сауаттылықты арттырудың, сыни ойлау қабілетін дамытудың және ақпараттық қауіпсіздік талаптарын сақтаудың маңызына назар аударылды.
Зайырлы қоғам құндылықтарын құрметтеу – ортақ міндет. Кездесуде қоғамдағы өзара сыйластық, татулық пен келісімнің маңызы сөз болды. Студенттерге Қазақстанның зайырлы мемлекет ретіндегі қағидаттарын құрметтеу, түрлі көзқарастағы адамдармен мәдениетті қарым-қатынас орнату және қоғамдық тұрақтылықты сақтауға үлес қосу қажеттігі түсіндірілді.
Мұндай ақпараттық-түсіндіру кездесулері жастардың діни мәселелерге қатысты білімін толықтыруға, интернеттегі ақпаратты саналы түрде қабылдауына және теріс ықпалдан қорғану дағдыларын қалыптастыруға бағытталған.
Жастардың діни сауаттылығын арттыру – олардың ақпараттық кеңістікте дұрыс бағдар ұстануына және қоғамдағы келісім мен тұрақтылықты нығайтуға ықпал ететін маңызды бағыттардың бірі.
